Xəbərlər
Azərbaycan Gimnastika Federasiyasının hesabat-seçki xarakterli altıncı ümumi yığıncağı keçirilib
Birinci xanım Mehriban Əliyeva dördüncü dəfə Azərbaycan Gimnastika Federasiyasının prezidenti seçilib
Dekabrın 24-də Milli Gimnastika Arenasında Azərbaycan Gimnastika Federasiyasının (AGF) hesabat-seçki xarakterli altıncı ümumi yığıncağı keçirilib. Birinci xanım Mehriban Əliyeva dördüncü dəfə Azərbaycan Gimnastika Federasiyasının prezidenti seçilib.
AZƏRTAC xəbər verir ki, tədbir Azərbaycanın dövlət himninin səsləndirilməsi ilə başlayıb. Sonra gimnastika ailəsinin hesabat dövründə dünyasını dəyişən üzvlərinin xatirəsi bir dəqiqəlik sükutla yad olunub.
Mandat komissiyası Federasiya üzvlərinin 93 faizinin yığıncaqda iştirakını təsdiq etdikdən sonra AGF-in vitse-prezidenti Altay Həsənov ötən beş ildə görülmüş işlərlə bağlı hesabat məruzəsi ilə çıxış edib. Altay Həsənov bildirib ki, 2002-ci ildə Mehriban Əliyevanın Federasiyanın prezidenti seçilməsindən sonra Azərbaycanda gimnastikanın təbliği, kütləviləşdirilməsi və inkişafı istiqamətində mühüm tədbirlər həyata keçirilib. Hazırda Azərbaycanda gimnastikanın yeddi növü üzrə idmançılar yetişirlər və onlar beynəlxalq yarışlarda ölkəmizi uğurla təmsil edirlər.
Bu ilin gimnastlarımız üçün uğurlu olduğunu vurğulayan Altay Həsənov birinci Avropa Oyunlarında idmanın bu növü üzrə 7 medal qazanıldığını xatırladıb. Vitse-prezident Oleq Stepkonun beş medalla Azərbaycan gimnastikası tarixində yeni rekord müəyyənləşdirdiyini vurğulayıb. Qeyd olunub ki, Oleq Stepko və Marina Durunda 2016-cı il Rio-de-Janeyro Yay Olimpiya Oyunlarına artıq lisenziyalar qazanıblar. Azərbaycan ilk dəfə olaraq Olimpiya Oyunlarında ən az iki gimnast ilə təmsil ediləcək.
Federasiya rəsmisi hesabat dövründə istifadəyə verilən Milli Gimnastika Arenasında bir çox ölkənin gimnastlarının da təlim-məşq toplanışı keçirdiklərini diqqətə çatdırıb. Azərbaycanın beynəlxalq idman qurumlarında da yüksək səviyyədə təmsil olunduğunu söyləyən A.Həsənov AGF-in baş katibi Fərid Qayıbovun Avropa Gimnastika Federasiyasının vitse-prezidenti seçildiyini xatırladıb.
Azərbaycanda gimnastikanın inkişafına böyük diqqət və qayğı göstərildiyini deyən A.Həsənov bildirib ki, Bakı ilə yanaşı, on bölgədə gimnastika bölmələri fəaliyyət göstərir. Diqqətə çatdırılıb ki, 2016-cı ildə Azərbaycanda gimnastikanın müxtəlif növləri üzrə dünya kuboku uğrunda üç turnir, 2018-ci ildə batut gimnastikası üzrə Avropa birinciliyi, bir il sonra isə bədii gimnastika üzrə dünya çempionatı təşkil olunacaq.
Sonra Azərbaycan Gimnastika Federasiyasının rəhbərliyinə seçkilər keçirilib.
Səsvermənin yekunlarına əsasən, birinci xanım, Heydər Əliyev Fondunun prezidenti, Milli Məclisin deputatı Mehriban Əliyeva yekdilliklə yenidən Azərbaycan Gimnastika Federasiyasının prezidenti seçilib.
Federasiyanın vitse-prezidenti vəzifəsinə yenidən Altay Həsənov, İcraiyyə Komitəsinin üzvlüyünə isə Milli Məclisin deputatı Rauf Əliyev, Heydər Əliyev adına İdman Arenasının direktoru Rafiq Behbudov və bədii gimnastika üzrə Azərbaycan yığma komandasının baş məşqçisi Mariana Vasilyeva seçiliblər.
Yığıncaqda, həmçinin son illərdə ölkəmizdə gimnastikanın inkişafındakı xidmətlərinə görə idmançı, məşqçi və mütəxəssislərin bir qrupuna AGF-in təsis etdiyi xatirə medalları təqdim olunub. AGF-in İcraiyyə Komitəsinin sabiq üzvü Arif Qafarov qızıl, idman gimnastı Oleq Stepko və onun şəxsi məşqçisi Pavel Netreba gümüş medallarla təltif ediliblər. Bürünc medallara isə Mariana Vasilyeva, Marina Durunda, Anastasiya Prosolova, İlya Qrişunin, Petro Paxnyuk, Eldar Səfərov, Vladimir Şulenin, qrup hərəkətləri komandası və digərləri layiq görülüblər.
Hesabat-seçki yığıncağı başa çatdıqdan sonra Mili Gimnastika Arenasının əsas zalında gimnastlarımızın iştirakı ilə “Yeni il gecəsində yuxu” adlı qala-konsert keçirilib.