Xəbərlər
Qan yaddaşımızı gələcək nəsillərə ötürməliyik
Fəsli Nəbiyev
YAP Gənclər Birliyinin sədr müavini
32-ci il dönümündə Xocalı soyqırımı qurbanlarının əbədi xatirəsini yad edərək onların müqəddəs ruhlarına Allahdan rəhmət diləyirik. Soyqırımı qurbanlarının xatirəsinə ucaldılmış “Ana harayı” abidəsini ziyarət edən hər bir vətəndaşımız burada öz ehtiramlarını faciə qurbanlarına çatdırarkən həm də məğrur qürur hissi keçirdir.
2020-ci il Vətən müharibəsində Azərbaycan Ordusu 30 il işğal altında qalan torpaqlarımızı azad etməklə yeni reallıq yaratdı, “dəmir yumruq” qalib gəldi. 44 günlük müharibədə misilsiz igidlik nümunələri göstərən qəhrəman ordumuz Müzəffər Ali Baş Komandanın rəhbərliyi ilə Xocalı faciəsi qurbanlarının da qisasını aldı, şəhidlərimizin qanı yerdə qalmadı. Xocalı şəhəri 2023-cü il sentyabrın 19-20-də Azərbaycan Ordusunun Qarabağda keçirdiyi lokal xarakterli antiterror tədbirləri nəticəsində separatçılardan təmizlənib. Azərbaycan Respublikasının Prezidenti İlham Əliyev 2023-cü il oktyabrın 15-də Xocalı şəhərində Azərbaycan Respublikasının Dövlət Bayrağını ucaldıb.
Biz heç bir zaman Ermənistan silahlı qüvvələrinin beynəlxalq hüququn norma və prinsiplərini kobudcasına pozaraq 1992-ci ilin fevralın 25-dən 26-na keçən gecə keçmiş sovet ordusunun Xankəndidə yerləşən 366-cı alayının iştirakı ilə Xocalı şəhərinə hücumunu və dinc əhaliyə misli görünməmiş qəddarlıqla vəhşiliklər törətməsini unutmayacayıq. Xocalı soyqırımı zamanı 106 qadın, 63 uşaq və 70 yaşlı insan olmaqla 613 nəfər qətlə yetirildi, 1275 sakin girov götürüldü, 150 nəfərin taleyi isə bu günədək naməlum qalıb. Şəhər yerlə-yeksan edildi. Həmin faciəvi gecə zamanı 487 nəfər Xocalı sakini ciddi şəkildə şikəst edildi və onlardan 76 nəfəri uşaqlardan ibarət idi. 8 ailə tamamilə məhv edildi, 25 uşaq hər iki valideynini və 130 uşaq isə bir valideynini itirdi. Qətlə yetirilən insanlardan 56 nəfəri xüsusi qəddarlıqla - diri-diri yandırılaraq, başının dərisi soyularaq, boynu vurularaq, gözləri çıxarılaraq, hamilə qadınların isə qarın boşluğuna süngü ilə vurularaq öldürüldü.
Qan yaddaşımızı gələcək nəsillərə ötürmək hazırki gənc nəslin üzərinə düşən ən vacib vətəndaşlıq borclarından biridir. Biz tariximizin Xocalı soyqırımını daim xatırlamalı və haqq səsimizi daima dünya ictimaiyyətinə çatdırmalıyıq.