Xəbərlər
Ölkələrimiz arasında münasibətlərin inkişafında yeni mərhələ
Rüstəm Nağıyev
YAP Gədəbəy rayon təşkilatının sədri
Bu gün Azərbaycanla sıx əməkdaşlıq edən Avropa ölkələrindən biri də Bolqarıstandır. Azərbaycan Prezidenti İlham Əliyevin sentyabr ayının 30-da Bolqarıstana etdiyi səfər isə ölkələrimiz arasında əməkdaşlıq əlaqələrinin daha da inkişafına növbəti güclü təkan olacaq. Məlum olduğu kimi, 2015-ci ildə Bolqarıstanla Azərbaycan arasında strateji tərəfdaşlıq haqqında Birgə Bəyannamə imzalanıb. Məhz bu Bəyannamə bu gün iki ölkənin dost və strateji ölkələr kimi çıxış etmələrinə əsaslı zəmin yaratmışdır.
Dövlətimizin başçısı Bolqarıstanda mətbuata bəyanatla etdiyi çıxışında Yunanıstan-Bolqarıstan Qaz İnterkonnektorunun tarixi əhəmiyyət kəsb edən layihə olduğunu vurğulayaraq Bolqarıstan Prezidentini bu münasibətlə təbrik etmişdir. Məlumdur ki, məhz bu İnterkonnektor vasitəsilə Bolqarıstan artıq Azərbaycan qazını alacaq. Eyni zamanda da Yunanıstan-Bolqarıstan Qaz İnterkonnektoru həm Azərbaycan qazının Avropaya daha geniş miqyasda nəql olunmasına imkan verəcək, eyni zamanda, Avropa qitəsində enerji təhlükəsizliyinə də bunun çox böyük faydası olacaqdır. Daha bir vacib məsələ də budur ki, artıq Bolqarıstandan əlavə Avropanın daha 3 ölkəsi - Rumıniya, Macarıstan və Slovakiya əlavə qaz həcmini almaq və nəql etmək istədiklərini bəyan etmişlər. Bu ilin iyul ayında Prezident İlham Əliyev və Avropa Komissiyasının Prezidenti xanım Ursula Fon der Lyayen tərəfindən imzalanmış enerji sahəsində strateji tərəfdaşlıq haqqında Memoranduma əsasən, növbəti bir neçə ildə Azərbaycan Avropaya qaz ixracatını ən azı 2 dəfə artıracaq və buna imkan var. Azərbaycanın təsdiq edilmiş qaz ehtiyatları 2,6 trilyon kubmetrdir. Yeni və çoxşaxəli qaz nəqliyyat infrastrukturu ölkəmizə imkan verir ki, bir çox Avropa ölkələrini təbii qazla təmin etsin. Bu infrastruktur vasitəsilə qaz daha tez və etibarlı şəkildə Mərkəzi, Qərbi və Cənubi Avropaya çatdırıla bilər.
Öz çıxışında Prezident İlham Əliyev SOCAR-ın Bolqarıstanda ofisinin açılması məsələsinin də müzakirə olunduğunu qeyd etdi. Təbii ki, bu, ölkələrimiz arasında münasibətlərin inkişafında yeni dinamika olcaq. Dövlətimizin başçısı bildirdi ki, enerji sahəsində əməkdaşlıq təkcə təbii qazın ixracı ilə məhdudlaşmamalıdır. Buna görə də enerji ilə bağlı olan digər məsələlər də müzakirə mövzusu olub. Bu məsələlərdən elektrik enerjisinin ixracı və bu sahədə qarşılıqlı faydalı əməkdaşlıq, xam neftin Bolqarıstan istiqamətinə nəqli, Bolqarıstanda enerji infrastrukturunun yenilənməsində SOCAR-ın mümkün iştirakı xüsusi maraq kəsb edir.
Əlbəttə ki, bu gün formalaşan yeni geosiyasi vəziyyət nəqliyyat təhlükəsizliyini də önəmli məsələlərdən biri kimi diqqət mərkəzinə çəkib. Qeyd olunub ki, Azərbaycan öz ərazisində çox müasir nəqliyyat infrastrukturu yaratmışdır. Bura dəmir yolları, avtomobil yolları, yeni Beynəlxalq Dəniz Ticarət Limanı daxildir. Bütün bu infrastruktur obyektləri Azərbaycan üzərindən tranzit yüklərin həcminin artması məqsədini güdür. Bu il bu yüklərin həcmi təqribən 50 faizə yaxın artmışdır. Gələcəkdə isə bu rəqəm daha da böyük olacaq. Ona görə Bolqarıstan və Azərbaycan nəqliyyatçıları indidən bir araya gələrək uzunmüddətli və genişmiqyaslı gələcək əməkdaşlıq haqqında fikir mübadiləsi aparıblar.
Əminliklə demək olar ki, Prezident İlham Əliyevin Bolqarıstana səfəri və bu səfər çərçivəsində keçirilən görüş və müzakirələr bütövlükdə iqtisadiyyat və sərmayə sahələrində ölkələrimiz arasında əməkdaşlığın dərinləşməsi üçün müstəsna dərəcədə önəmli rol oynayacaq.