Xəbərlər
Şuşa bəyannaməsi Azərbaycan-Türkiyə münasibətlərində çoxşaxəli əməkdaşlığa imkan yaradır
Elçin İsmayılov
Yeni Azərbaycan Partiyası Goranboy rayon təşkilatının sədri
Şuşa bəyannaməsi iki qardaş ölkənin, Azərbaycan və Türkiyənin müttəfiqliyinin əsasını təşkil edir. Azərbaycan Prezidenti İlham Əliyev və Türkiyənin dövlət başçısı Rəcəb Tayyib Ərdoğanın Şuşada imzaladığı Şuşa Bəyannaməsi siyasi, iqtisadi, təhlükəsizlik, nəqliyyat, enerji, müdafiə və hərbi-texniki sahələri əhatə edən müttəfiqlik müqaviləsidir.
Azərbaycanla Türkiyə arasında müttəfiqlik münasibətləri barədə Şuşa bəyannaməsinin imzalanması iki ölkə arasında əlaqələrdə mühüm tarixi hadisədir. Münasibətlər ən yüksək səviyyəyə, strateji müttəfiqlik səviyyəsinə çatıb. Bəyannamənin müddəaları Ümummilli Lider Heydər Əliyevin irəli sürdüyü bir millət-iki dövlət ideyasına uyğundur.
Şuşa bəyannaməsinin regional təhlükəsizlik və inkişafa verəcəyi töhfələrin miqyasını görə bilərik. Azərbaycan dövləti 44 günlük Vətən müharibəsində qazanmış olduğu tarixi zəfərlə regionda yeni geosiyasi konfiqurisiya formaılaşdırdı. Qardaş Türkiyə dövlətinin Cənubi Qafqaz geosiyasətində həlledici aktora çevrilməsi yeni reallıqların əsas təzahürlərindən biridir.
Bəyannamədə Zəngəzur dəhlizinin açılması ilə bağlı çox açıq ifadələr öz əksini tapmışdır. Bu da İkinci Qarabağ savaşından sonra yaranmış yeni geosiyasi vəziyyətin nəticəsidir. Türkiyə ilə Azərbaycanı dəmiryolu və avtomobil yolu ilə birləşdirəcək Zəngəzur dəhlizi olduqca böyük əhəmiyyətə malikdir. Müttəfiqlik haqqında imzalanmış birgə bəyannamədə bu məsələnin əks olunması böyük məna daşıyır.
Azərbaycan Respublikası ilə Türkiyə Cümhuriyyəti arasında müttəfiqlik haqqında Şuşa Bəyannaməsi bir daha bunu sübut edir ki, bu əlaqələr iki ölkə arasında ümumi maraqlardan doğan, təbii zərurətdən irəli gələn yeni bir keyfiyyət mərhələsidir.