Xəbərlər
Ziya Selçuk: Qarabağ Zəfəri bütün türk vətəndaşlarının son dövrlərdə yaşadığı ən böyük sevincdir
Biz Azərbaycana Türkiyə xalqının salamları ilə, böyük bir sevinclə gəldik. Tarixə yazılan Qarabağ Zəfərinin qəlbimizdəki sevinci ilə buradayıq. Min ildən sonra da Sizin adınız tarixdə uşaqlar tərəfindən tərənnüm ediləcək və uşaqlar Sizin adınızı, xalqın, şəhid olan əsgərlərimizin adını əzbər söyləyəcəklər, İnşallah. Bu, küçələrə çıxan bütün türk vətəndaşlarının son dövrlərdə yaşadığı ən böyük sevincdir və biz çox xoşbəxtik.
Bu fikirləri Azərbaycan Prezidenti İlham Əliyev ilə görüşdə Türkiyənin milli təhsil naziri Ziya Selçuk söyləyib.
Nazir qeyd edib ki, bizim aramızdakı təhsil proqramları, təhsilin inkişafı, gələcəklə bağlı görüləcək işlərlə əlaqədar heç bir problem ola bilməz. Biz hamısını həll edərik. “Bu çərçivədə peşə fəaliyyəti ilə bağlı imzaladığımız protokol da hazırda həyata keçirilir. Bu gün də onunla bağlı müzakirələri davam etdirəcəyik. Bizim əlaqələrimiz, münasibətimiz rəsmi münasibətdən də yüksək səviyyədə davam edir. Proseslərin, işlərin sürətləndirilməsi üçün nə lazımdırsa, birlikdə edirik”, - deyə Ziya Selçuk vurğulayıb.