Xəbərlər
Ağcabədidə Qələbə Bayramı qeyd edilmişdir
Ağcabədi rayon İcra Hakimiyyəti və YAP Ağcabədi rayon təşkilatınını təşkilatçılığı ilə Şuşa şəhərinin işğaldan azad edilməsi və II Qarabağ müharibəsində Ermənistan üzərində qələbə qazanılması ilə əlaqədar Ağcabədidə silsilə tədbirlər keçirilmişdir. Yüzlərlə YAP fəalı və gənclər əllərində Azərbaycan və Türkiyənin bayraqlarını tutaraq, küçə və meydanlara çıxaraq bayramı böyük coşqu ilə qeyd etmişlər.
Şuşanın işğaldan azad edilməsi ilə əlaqədar YAP Ağcabədi rayon təşkilatının inzibati binasının qarşısında keçirilən tədbiri YAP rayon təşkilatının sədr müavini Eldəniz Qənbərov açmışdır.
Tədbirdə Ağcabədi rayon İcra Hakimiyyətinin Başçısı Rafil Hüseynov, YAP Ağcabədi rayon təşkilatının Qadınlar Şurasının sədri Radə Qafarova, Azərbaycan Dövlət Pedaqoji Universitetinin Ağcabədi filialının müəllimi Tahir Kərimli, Şuşa sakinləri Mətanət Fərzəliyeva və Əliş Abbasov çıxış edərək tədbir iştirakçılarını, bütövlükdə Azərbaycan xalqını təbrik etdilər. Çıxışlarda vurğulandı ki, Azərbaycan Respublikasının Prezidenti, Ali Baş Komandan cənab İlham Əliyevin rəhbərliyi ilə rəşadətli ordumuzun müzəffər yürüşü nəticəsində Sentyabrın 27-dən başlayaraq Azərbaycan Ordusu 30 ildən artıq işğal altında olan yaşayış məntəqələrini, o cümlədən Qarabağın tacı olan Şuşanı işğaldan azad etmişlər. Bu qələbə iqtidar, xalq, ordu birliyinin bariz nümunəsi olmaqla Azərbaycanın tarixində yeni bir salnamədir.
Qarabağın işğaldan azad olunmasi ilə əlaqədar keçirilən tədbirdə əllərində bayraqlar və plakatlar tutan gənclər maşın karvanları ilə Ağcabədi şəhərinin Heydər Əliyev meydanından şəhidlər xiyanbanınadək yürüş etmiş, gənclərin bir qrupu isə eni 6 metr, uzunluğu 50 metr olan Azərbaycan bayrağını yol boyu başları üzərində dalğalandırmışlar.
Tədbir YAP Ağcabədi rayon təşkilatının inzibati binasının qarşısında böyük konsert proqramı ilə bütün gün ərzində davam etmişdir.
