Xəbərlər
Düşünək, səs verək, davamlı inkişafa dəstək olaq!
Namizədliyi Yeni Azərbaycan Partiyası tərəfindən 33 saylı Xətai birinci seçki dairəsindən irəli sürülən Hüseynbala Mirələmov rus icmasının üzvləri ilə görüşdü.
Xətai rayonunda Rus İcmasının sədri Qalina Manafova ölkəmizin tolerantlıq, multikulturalizm təcrübəsini önə çəkərək deputatlığa namizəd H.Mirələmovun yaradıcılığının əsasında da məhz bu amillərin dayandığını qeyd etdi.
Namizədliyi Yeni Azərbaycan Partiyası tərəfindən 34 saylı Xətai ikinci seçki dairəsindən irəli sürülən, Azərbaycandakı Rus İcmasının sədri Zabelin Mixail Yuriyeviç bildirdi ki, seçicilərlə görüşdən aydın olan bir həqiqət budur ki, Xətai seçiciləri H.Mirələmovun deputatlıq fəaliyyəti dövründə gördüyü işləri yüksək dəyərləndirərək, onu yenidən Milli Məclisdə görmək istəyirlər. Bu istəklərini 9 fevral növbədənkənar parlament seçkilərində seçki məntəqələrinə gəlib fəal iştirak etməklə təsdiqləyəcəklər.
Namizədin vəkili, tibb elmləri doktoru, professor Vəsadət Əzizov seçicilərə müraciət etdi- Azərbaycanın uğurlu gələcəyi naminə Yeni Azərbaycan Partiyasının namizədlərinə dəstək olaq.
Deputatlığa namizəd, texnika elmləri doktoru, professor Hüseynbala Mirələmov özlüyündə yaranan «Ötən dövrdə nə işləri görmüşük» sualına cavab olaraq bildirdi ki, millət vəkilinin gördüyü iş, ilk növbədə, qəbul etdiyimiz qanunların gücündədir. Çünki iqtisadiyyatımız da, təhlükəsizliyimiz də, sosial rifahımız da, mənəviyyatımız da bilavasitə qanunların mükəmməlliyi ilə bağlıdır.
H.Mirələmov seçiciləri müasir, yeni, təkmil parlamentin formalaşmasına hədəflənmiş 9 fevral növbədənkənar parlament seçkilərində fəal olmağa, yaxşı düşünüb, layiqli namizədlərə səs verməyə çağırdı.
Diskussiya şəklində davam edən görüşdə seçiciləri maraqlandıran suallar cavablandırıldı.
