Xəbərlər
Ulu öndər ideyalarına sədaqət
Rüstəm Nağıyev
YAP Gədəbəy rayon təşkilatının sədri
1992-ci il noyabrın 21-də ulu öndər Heydər Əliyevin sədrliyi ilə Yeni Azərbaycan Partiyasının təsis konfransının keçirilməsi yeni müstəqil Azərbaycanın tarixində parlaq gələcəyin əsasını qoydu. Ulu öndər Heydər Əliyevin yaratdığı Yeni Azərbaycan Partiyası Azərbaycanın siyasi palitrasına yeni nəfəs gətirdi. Azərbaycan Respublikasının Prezidenti, Yeni Azərbaycan Partiyasının sədri İlham Əliyevin YAP-ın VII qurultayında qeyd etdiyi kimi, partiya Heydər Əliyevin ətrafında yaradılmışdır, onun siyasi təcrübəsi, bilikləri, xalq qarşısında göstərdiyi xidmətlər, Naxçıvanda çalışdığı dövrdə göstərdiyi əsl vətənpərvərlik və öz xalqına olan sadiqlik Azərbaycanın mütərəqqi insanlarını onun ətrafında birləşdirdi.
Yaradılmasından yeddi aydan sonra ulu öndər Heydər Əliyevin Prezident seçilməsi ilə iqtidar partiyasına çevrilən Yeni Azərbaycan Partiyası ölkəmizin strateji xəttini müəyyən edilməsində ilk növbədə, Konstitusiyanın qəbul edilməsində mühüm addımlar atdı və dövlətçiliyin əsasları qoyuldu, dövlət təsisatları düzgün zəmində formalaşdırılmış oldu. Eyni zamanda beynəlxalq aləmdə bizə qarşı olan əsassız mövqeyə düzəlişlər edildi, beynəlxalq təcridi, o cümlədən informasiya blokadası Azərbaycan həqiqətləri dünya ctimaiyyətinin diqqətinə çatdırıldı.
44 günlük müharibədə qazandığımız qələbə, antiterror əməliyyatı nəticəsində ölkəmizin ərazi bütövlüyünün və suverenliyinin tam bərpası illər uzunu çəkilmiş zəhmətin bəhrəsidir və bu qazandığımız ilk növbədə xalq-iqtidar birliyi nəticəsində mümkün olmuşdur. Bu birliyin yaranması və möhkəmlənməsi əsas siyasi güc olan YAP-ın siyasi dividentidir. Bu da özünü son prezident seçkilərində bir daha təsdiq etmiş oldu. Seçkidə iştirak edən seçicilərin 90,05 faizinin YAP-ın Sədri İlham Əliyevə yenidən etimad göstərməsi xalqın inamının göstəricisi kimi qiymətləndirilməlidir.
Bu gün Yeni Azərbaycan Partiyası siyasi sistemin lokomotivi və güc mərkəzidir. Başqa sözlə, YAP sahib olduğu resurslara, ictimai-siyasi nüfuzuna, özünün fəaliyyət mexanizminin səmərəlilik səviyyəsinə və siyasi sistemdəki avanqard yerinə görə Azərbaycanın siyasi palitrasının ən güclü və nüfuzlu siyasi partiyasıdır. YAP, eyni zamanda, ölkəmizdə siyasi mədəniyyətin və siyasi sistemin formalaşmasına, təkmilləşməsinə birbaşa, fundamental töhfələr verən ümumxalq partiyasıdır. Partiyanın fundamental resursları sırasına onun öz ətrafında cəmiyyətin ən nüfuzlu ictimai-siyasi fiqurlarını birləşdirməsi, üzvlərinin sayının 800 min nəfərə yaxın olması, güclü siyasi idarəçilik təcrübəsinə malik olması kimi kəmiyyət və keyfiyyət göstəriciləri daxildir. Partiyamızın çoxminli üzvləri Heydər Əliyev ideyalarına sadiq qalaraq bu ideyaların təbliğində, partiyamızın Sədri, ölkə Prezidenti İlham Əliyevin siyasətinin təşviqində aktiv mövqeyə malikdirlər. Bütövlükdə, Azərbaycan cəmiyyətinin intellektual potensialı YAP-ın sıralarında cəmləşib, gənclərimiz və qadınların partiyanın həyatında fəal iştirak edirlər.