Xəbərlər
İƏT Pİ-nin nümayəndəsi: Bu seçkilər Azərbaycan üçün tam bir demokratik bayram oldu
Fevralın 8-də İslam Əməkdaşlıq Təşkilatı Parlament İttifaqı (İƏT Pİ) müşahidə missiyası növbədənkənar prezident seçkilərinin yekunları ilə bağlı mətbuat konfransı keçirib.
Qurumun müşahidə missiyasının rəhbəri, Baş katibin müavini Əli Əsgər Mohammadi Sicani Azərbaycanda keçirilən növbədənkənar prezident seçkilərinin çox yüksək səviyyədə keçirildiyini deyib.
“Bu seçkilər Azərbaycan üçün tam bir demokratik bayram oldu. Bu, çox əhəmiyyətli bayram idi, çünki ilk dəfə seçkilər Azərbaycanın bütün ərazilərində keçirildi”, - deyə missiya rəhbəri vurğulayıb.
İƏT Pİ-nin rəsmisi seçici fəallığına və xüsusilə qadınların aktivliyinə diqqət çəkib.
“Azərbaycan nəhayət 30 illik işğaldan sonra ərazi bütövlüyünü tam bərpa edib. Bu, bizi çox sevindirir”, - deyən missiya rəhbəri işğaldan azad edilmiş ərazilərdə seçkiləri izləmək imkanı olmadığına görə təəssüfləndiyini bildirib.
Qeyd edək ki, prezident seçkilərinin ilkin nəticələrinə görə, İlham Əliyev seçicilərin 92,05 faizinin səsini qazanaraq qalib olub.