Xəbərlər
Qalib Liderə dəstək olaq!
Xətai rayonunda seçicilərlə növbəti görüş keçirilib
2024-cü il fevralın 7-də ölkəmizdə keçiriləcək prezident seçkiləri ilə əlaqədar Yeni Azərbaycan Partiyası tərəfindən namizədliyi irəli sürülmüş cənab İlham Əliyevin seçkiqabağı təşviqat kampaniyası çərçivəsində yanvarın 22-də Xətai rayonunda seçicilərlə növbəti görüş keçirilib.
Görüşdə YAP Xətai rayon təşkilatının sədri Vüqar Rəhimzadə, YAP İdarə Heyətinin üzvü, Milli Məclisin deputatı Mixail Zabelin, “91-lər”dən, professor Zahid Xəlil, təşviqat qrupunun üzvləri - Vətən müharibəsi şəhidi, mayor Rüfət Əsgərovun atası Mürvət Əsgərov, Cəlal İbrahimli və başqaları çıxış ediblər. Çıxışlarda qeyd olunub ki, Azərbaycanın ərazi bütövlüyünün və suverenliyinin tam təmin olunması ilə ölkəmizin həyatında yeni dövr başlayıb. 7 fevral tarixli prezident seçkiləri yeni dövrün yeni hədəflərinin müəyyənləşdirilməsində stimul olacaq. Xalqımız bu seçkilərə böyük ruh yüksəkliyi ilə hazırlaşır. Azərbaycanın müstəqillik tarixində ilk dəfə olaraq bütün ölkə ərazisini əhatə edəcək bu seçkilərdə soydaşlarımızın öz doğma yurd-yuvalarında səsvermə prosesində iştirakı qürurvericidir. 30 il idi ki, soydaşlarımız bu günü səbirsizliklə gözləyirdilər. Artıq üç ildən çoxdur ki, bu arzu reallığa çevrilib. Tarixi Zəfərimizin reallıqları fonunda Qarabağımız və Şərqi Zəngəzurumuz dirçəlir, soydaşlarımız mərhələ-mərhələ öz doğma yurd-yuvalarına qayıdırlar. Əsas hədəf 2026-cı ilədək bu ərazilərə qayıdan keçmiş məcburi köçkünlərin sayını 140 minə çatdırmaqdır.
O da vurğulanıb ki, Yeni Azərbaycan Partiyası namizədi cənab İlham Əliyevin seçkiqabağı təşviqat kampaniyasını “Qalib xalqın qalib Lideri” devizi altında uğurla həyata keçirir. Seçicilərlə keçirilən görüşlər bu qənaəti yaradır ki, xalqın yeganə seçimi Yeni Azərbaycan Partiyasının namizədi cənab İlham Əliyevdir. Son 20 ildə Heydər Əliyev siyasətini uğurla davam etdirərək Azərbaycanın müasir tarixinə zəfər səhifələri yazan, torpaqlarımızın xilaskarı kimi nüfuz qazanan cənab İlham Əliyev bundan sonra da ölkəmizi uğurla inkişaf etdirəcək, sözünün imzası qədər dəyərini artıracaq. Bunun üçün 7 fevral növbədənkənar prezident seçkilərində fəal olmaq, gələcək hədəflərimizi yüksək səviyyədə reallığa çevirmək üçün səsvermə hüququmuzdan istifadə edərək qalib Liderə səs verək!
Qeyd edək ki, YAP Xətai rayon təşkilatının sədri Vüqar Rəhimzadə seçicilərlə fərdi, “qapı-qapı” seçki texnologiyasına uyğun olaraq "Babək 92”, “Seyid Əzim Şirvani 7”, “Babək 86” ünvanlarında yaşayan seçicilərlə görüşlər keçirib. Həmçinin Birinci Qarabağ müharibəsi şəhidi baş leytenant Hüseynov Səlahəddin Sabir oğlunun mənzilində olub.
