YENİ AZƏRBAYCAN PARTİYASI

 Son illər qardaş Türkiyədə baş vermiş dəhşətli zəlzələlər on minlərlə adamın həyatına son qoymuş, dəhşətli fəsadlar törətmişdir. Təbii ki, dünyada heç bir ölkə baş verə biləcək belə təbii faciələrdən-zəlzələlərdən sığortalanmamışdır. Ölkəmizin bir sıra bölgələrində son vaxtlar baş vermiş tektonik proseslər yeni inşa edilmiş yaşayış evlərinin və digər binaların baş verə biləcək zəlzələlərə davamlı olub-olmaması məsələsinin aktuallığını bir daha ortaya çıxarır, binaların tikintisində istifadə edilən betonun keyfiyyəti, markası ilə bağlı müxtəlif fikirlər söylənilir.

“Crystal  Beton” Qapalı  Səhmdar  Cəmiyyətinin  baş texnoloqu Nuşirəvan Rüstəmov KİV-ə açıqlamasında bu məsələlərlə əlaqədar suallara cavab vermişdir.

2022-ci ildə  “Biznes Time”  jurnalının apardığı sorğulara görə, “Crystal Beton” QSC-nin  “İlin beton istehsalçısı” nominasiyası üzrə qalib olduğunu bildirən N.Rüstəmov “QSC  artıq 20 ildən çoxdur ki, fəaliyyət göstərir. Səhmdar  Cəmiyyət özündə bir neçə ən müasir beton zavodunu birləşdirir. Zavodların hər biri ən müasir laboratoriya avadanlıqları ilə təchiz olunmuşdur. “Crystal Beton” QSC-də  çox güclü kadr potensialı formalaşmışdır. Səhmdar Cəmiyyət Bakı, Abşeron və Sumqayıtda əsas beton istehsalçılarındandır, respublikanın tikinti kompleksinə daxil olan əsas qurumlar arasında böyük nüfuza və  güvənə malikdir. Bütün bunlar isə illər ərzində yüksək keyfiyyət, dürüstlük və operativlik nəticəsində əldə olunmuşdur” ,-deyə bildirib.

Onun sözlərinə görə, təşəbbüskarlığın nəticəsidir ki,  “Crystal Beton” QSC-i  İSO 9001:Keyfiyyət İdarəetmə Sistemi Standartına, İSO 14001: Ətraf  Mühitin İdarəetmə Sistemi Standartına,  İSO 45001:  İş sağlamlığı və Təhlükəsizliyi İdarəetmə Sistemi Standartına malik sanballı bir qurumdur: “Əməkdaşlarımız  Bitrix 24 proqramından istifadə edərək vahid bir sistemdə çalışırlar. Bu proqram şirkət daxilində ümumi intizamın və iş keyfiyyətinin yüksəldilməsi üçün dünyada ən effektli proqramlardan biri hesab olunur. Bir sözlə, “Crystal Beton” QSC-də sistem ən müasir tələblər səviyyəsində qurulmuşdur. Onu da vurğulamaq istəyirəm ki, tikinti şirkətlərinə təkcə tələb olunan markada beton verməklə işimizi bitmiş hesab etmirik, eyni zamanda şirkətimizin mütəxəssiləri tərəfindən inşaat meydançalarında lazımi texniki xidmətlər göstəririk və çalışırıq ki, inşaatçılarımızı layihələr üzrə tələb olunan marka betonqarışıqları ilə təmin edək.

   Beton zavodlarımızda əsasən həcm çəkisi 2000-2400 kq/m³  olan ağır betonlar və həcm çəkisi 1400-1800 kq/m³  olan yüngül keramzit betonlar istehsal olunur. Bundan əlavə sifarişçilərin istək və tələblərinə uyğun olaraq aşağı marka betonlar da istehsal edirik. Adətən beton istehsalında geniş yayılmış və sınaq testlərində özünü doğruldan sementlərdən istifadə edirik. Bura 52,5 marka portland sement, 42,5 marka pussolan əlavəli portland sement, 42,5 marka R mineral əlavəli sulfatadavamlı portldan sementlər daxildir. Hazırda sifarişçi təşkilatların və fərdi şəxslərin tələblərinə uyğun olaraq 100 markadan 800 markayadək beton istehsal edirik. Tələbat və sifariş olarsa 1000 markayadək beton istehsal etmək imkanımız var. Betonun əsas keyfiyyət göstəricilərinə möhkəmlik, su keçirməzlik və şaxtaya davamlılıq aiddir. İstehsal olunan betonların qeyd olunan keyfiyyət göstəriciləri mütəmadi bizim laboratoriyalarda yoxlanılır. Betonun möhkəmliyi laboratoriya şəraitində yoxlanılır, bunun üçün betonun kub və silindr şəkilli nümunələri hidravliki pressdə sıxılmaqla nümunənin markası müəyyən edilir. Tikinti sahəsində isə, əvvəlcədən tökülmüş betonların möhkəmliyini (markasını) Smit çəkicləri vasitəsilə müəyyən edirik. İsti havalarda beton istehsalı zavodlarda quraşdırılmış su soyutma sistemlərindən istifadə edilməklə suyu 5°C- yə qədər soyutmaqla və quru buzdan istifadə etməklə, həmçinin isti havalar üçün nəzərdə tutulmuş qatqılardan istifadə etməklə yerinə yetirilir.   Soyuq havalarda isə betonun tərkibindəki materiallar və su buxar vasitəsilə müəyyən qədər qızdırılmaqla beton istehsal olunur. Şaxtalı havalarda beton istehsal edərkən materialları qızdırmaqla yanaşı betonun tərkibinə şaxtayadavamlı kimyəvi qatqılar da əlavə edilir.  Qeyd etdiyim kimi zavodlarımızda quraşdırılmış müasir laboratoriyalarda betonun tərkibindəki materialların keyfiyyət göstəriciləri müəyyən edilir. Betona qoyulmuş texniki tələblərə uyğun olaraq superplastikləşdirici, polimer, ləngidici və bərkiməni sürətləndirən qatqılardan istifadə edirik. Sifarişçinin tələbinə uyğun olaraq bəzən beton qəliblərin tez sökülməsi istənilir. Bu məqsədlə, betonun möhkəmliyinin erkən təmin olunması üçün bərkiməni tezləşdirən qatqılardan istifadə etmək tələb olunur və məsləhət görülür.  Zəlzələyə davamlı beton istehsal etmək üçün ilk növbədə, beton qarışıqların tərkibində yüksək keyfiyyətli materiallardan istifadə olunmalı, yüksək marka betondan istifadə olunmalı, armatur elementləri düzgün hesablanmalı, mühafizə qatı düzgün qoyulmalıdır. Eyni zamanda, zəlzələyə davamlı betonlar hazırlamaq üçün yuxarıda qeyd olunanlarla yanaşı, armatur karkasla bərabər fibrobetondan istifadə etsək zəlzələyə davamlı konstruksiya almış olarıq. Beton qarışıqların hazırlanmasında istifadə olunan su da digər komponentlər kimi mütəmadi olaraq laboratoriyamızda analiz edilir, yoxlanılır. Beton qarışıqların hazırlanmasında hidrogen göstəricisi  (pH) 4-dən az və 12,5-dən çox olmayan içməli sudan istifadə olunur. Suyun tərkibində sulfatların miqdarı 2700  mq/litrdən, bütün duzların miqdarı isə 5000 mq/litrdən çox olmamalıdır.   Əsas tövsiyyəm odur ki, tikinti işlərinə peşəkar inşaatçıları cəlb etsinlər, mütəmadi betonun keyfiyyətinə nəzarət etsinlər. Ən vacib tövsiyyəm: özünün sınaq laboratoriyası və qarışdırıcı mikserləri olan beton zavodlardan beton qarışıqları alsınlar, yəni zəlzələyə davamlı binaların tikintisi üçün keyfiyyətli beton məmulatlarını ancaq peşəkarlardan alsınlar! Sonda  xalqımızın belə bir deyimini xatırlatmaq istərdim: “Həkimin 1 səhvi nəticəsində 1 nəfər dünyasını  dəyişərsə, 1 mühəndisin xırda 1 səhvi 100-lərlə insanın həyatına son qoya bilər!” Mənzil almaq istəyənlərə bir tövsiyəm də budur ki, mənzili alarkən onun qiymətinin aşağı olmasına deyil, keyfiyyətlə tikilməsinə, hansı marka betondan istifadə etdiklərini, betonun mənbəyini (istehsalçı və sair) özləri üçün dəqiqləşdirsinlər. Yüksək marka adı altında ucuz betona deyil, keyfiyyətli betona üstünlük verilməlidir! Azərbaycanda çox güclü peşəkar beton istehsalçıları və inşaatçılar ordusu yetişmişdir. Heç şübhəsiz ki, onların inşa etdiyi mənzillərdə soydaşlarımız heç bir zəlzələ təhlükəsi olmadan rahat, risksiz yaşayacaqlar! Onu da dəyərli soydaşlarımızın diqqətinə çatdırmaq istəyirəm ki, Azərbaycanımızın aidiyyəti  dövlət qurumları tərəfindən istər beton istehsalına, istərsə də tikinti işlərinə lazımi dövlət nəzarəti həyata keçirilir”.