Xəbərlər
Erməni riyakarlığı fiaskoya uğradı
Əlişah Rəcəbov
YAP Ağdaş rayon təşkilatının sədri
2020-ci ildə 44 günlük müharibə zamanı ağır məğlubiyyətə uğrayan və kapitulyasiya aktına imza atan Ermənistan hazırda reinteqrasiya prosesinə maneə törətmək cəhdlərinə əl atır. Monoetnik və etnik ayrı-seçkilik siyasəti yürüdən Ermənistanın Azərbaycanın Qarabağ bölgəsində yaşayan ermənilərin Azərbaycana reinteqrasiyasını əngəlləməkdə əsas motivlərindən biri ölkəmizdə iki xalqın nümayəndələri arasında uğurlu birgəyaşayışının qarşısının alınmasıdır. Halbuki, Azərbaycan çoxmillətli dövlətdir və milli azlıqlar arasında heç bir ayrı-seçkilik yoxdur.
Qarabağ bölgəsində yaşayan ermənilərin Azərbaycana reinteqrasiyasına, eləcə də sülh prosesinə əngəl törətmək üçün rəsmi İravan davamlı təxribatlarla məşğul olur. Əvvəlcə hərbi təxribatlar törədən Ermənistan hazırda erməni lobbisi və Qarabağdakı separatçılarla birgə digər istiqamətlərdə də təxribatlarla məşğul olur. Beynəlxalq ictimaiyyətdə yanlış təsəvvür yaratmaq üçün “blokada” və ya “humanitar böhran” şousu xüsusilə gündəmdədir. Təbii ki, bu şounun yaradılmasında erməni lobbisi, eləcə də anti-Azərbaycan mövqeyi ilə seçilən Fransa hökuməti böyük canfəşanlıq edir.
“Blokada” və “humanitar böhran” şousu üzərindən riyakar niyyətinə nail olmağa çalışan Ermənistanın növbəti avantürası iflasa uğradı. Belə ki, rəsmi İrəvan Azərbaycanın Laçın dəhlizini guya blokadaya alması və “Dağlıq Qarabağ” ermənilərini aclıqla soyqırımına məruz qoymasını BMT TŞ-nin 16 avqust 2020-ci il tarixli növbədənkənar iclasında rəsmiləşdirərək Azərbaycana qarşı sanksiyalar tətbiq edilməsinə, Laçın dəhlizinin beynəlxalq gücdən istifadə edərək açılmasına çalışırdı. Faktiki olaraq heç bir dövlət Ermənistanın tezislərini dəstəkləmədi, Azərbaycanı qeyd edilən iddialarla bağlı ittiham etmədi. Bu Azərbaycanın xarici siyasətinin, beynəlxalq təşkilatlarda məqsədyönlü siyasətinin bariz uğur nümunəsidir. Təbii ki, ölkəmizin diplomatik müstəvidə qazandğı uğurlarının əsasını Prezident cənab İlham Əliyevin uzaqgörən xarici siyasəti təşkil edir. Prezident cənab İlham Əliyevin düşünülmüş xarici siyasəti, qonşu dövlətlərlə balanslı münasibətlər qurması, Qoşulmama Hərəkatına üzv dövlətlərlə ikitərəfli və çoxtərəfli münasibətləri inkişaf etdirməsi, beynəlxalq təşkilatlarda doğru istiqamətlərdə fəaliyyət göstərilməsi konsepsiyasının hazırlaması və tətbiq etməsi, tərəfdaş ölkələrlə qarşılıqlı maraqları eyni müstəviyə gətirməsi, strateji düşüncəni ön planda tutması Təhlükəsizlik Şurasında Ermənistanın son ümidlərinin puça çıxması ilə nəticələndi.
Təhlükəsizlik Şurasındakı müzakirələrdə çıxış edən dövlətlərin əksəriyyətinin balanslı çıxışları Azərbaycanın mövqeyini daha da gücləndirdi, ərazi bütövlüyünün təmin edilməsinin beynəlxalq hüquqa uyğun olduğunu bir daha təsdiqlədi. Məruzəçi dövlətlər tərəfindən Laçın dəhlizinə paralel olaraq Ağdam-Xankəndi yolunun da istifadə edilməsinin mümkünlüyünün bildirilməsi tamamilə Azərbaycanın maraqlarına cavab verir. Bu da onu təsdiq edir ki, Azərbaycan öz mövqeyində haqlıdır və Ağdam-Xankəndi yolu mütləq açılmalıdır. Təhlükəsizlik Şurasındakı müzakirələr həmçinin Qarabağdakı Ermənistan silahlı qüvvələrinin tərksilah edilməsinin vacibliyini göstərdi, Azərbaycanın terror cəhdinin qarşısını almaq məqsədilə həyata keçirdiyi əməliyyatların legitimliyini təsdiqlədi. Bir sözlə, Ermənistanın BMT Təhlükəsizlik Şurasından növbəti dəfə öz şantaj kampaniyası üçün istifadə etmək cəhdi uğursuzluğa düçar oldu.