Xəbərlər
İşğaldan azad edilmiş ərazilərdə bərpa quruculuq işləri planlı şəkildə həyata keçirilir
Elçin İsmayılov
YAP Goranboy rayon təşkilatının sədri
Azərbaycan 2020-ci ilin 44 günü ərzində Prezident, Ali Baş Komandan İlham Əliyev rəhbərliyi, xalqımızın birliyi, Ordumuzun gücü, əsgər və zabitlərimizin qəhrəmanlığı nəticəsində son yüzilliklərin ən möhtəşəm qələbəsini qazandı. Vətən müharibəsində möhtəşəm Zəfərdən sonra Azərbaycan öz torpaqlarını azad etməklə tarixi inkişafının irimiqyaslı bərpa - quruculuq layihələri ilə səciyyələnən, dayanıqlı sülhə, tərəqqiyə əsaslanan və bir çox ölkələr üçün nümunə olan yeni inkişaf mərhələsinə qədəm qoymuşdur.
Dövlət başçımız noyabr ayının 16-da imzaladığı Sərəncamı ilə layiqli şəkildə geri dönməsinin təmin edilməsi istiqamətində çox mühüm sənəd, "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı" imzalanmışdır.
Dövlət Proqramının hazırlanmasında mütərəqqi beynəlxalq təcrübə, bu sahədə strateji inkişaf tendensiyaları, işğaldan azad edilmiş ərazilərin sosial - iqtisadi potensialı və dünya iqtisadiyyatının müasir çağırışları nəzərə alınmışdır. Dövlət Proqramının əhatə dairəsini Qarabağ və Şərqi Zəngəzur iqtisadi rayonlarına daxil olan ərazilər təşkil edir.
Dövlət Proqramında nəzərdə tutulan vacib məsələlərdən biri də ərazilərin minalardan və partlamamış hərbi sursatlardan təmizlənməsi və təhlükəsizliyin təmin olunmasıdır. Ərazilərdə şəhər, qəsəbə və kənd yaşayış məntəqələri tikilərək hamı üçün əlçatan, etibarlı, keyfiyyətli və dayanıqlı infrastrukturla təmin ediləcəkdir. Nəqliyyat - yol, rabitə, su, qaz, elektrik, istilik və s. infrastrukturlar yenidən qurulacaqdır.
Ölkədə iqtisadiyyatın dinamik inkişafının təmin edilməsi bütün sahələrin tərəqqisini təmin edib, əhalinin gəlirlərinin artmasını, işsizliyin həmçinin yoxsulluğ səviyyəsinin azalmasını şərtləndirib və vətəndaşların rifahı daha da yaxşılaşdırıb.
Dövlət başçımız İlham Əliyevin müvafiq tapşırıqları əsasında işğaldan azad edilmiş ərazilərdə görülən bərpa quruculuq işləri düşünülmüş, planlı şəkildə həyata keçirilir və bütün sahələri əhatə edir. İlk növbədə enerji infrastrukturunun qurulması, əhalinin həyat şəraitinin yaradılması üçün elektrik, su, qaz, istilik təchizatı və kanalizasiya xidmətlərinin qurulması, daha sonra internet, poçt xidmətləri, rabitə infrastrukturu təmin edilmişdir. Xidmət sahələrinin əhatə dairəsinin genişləndirilməsi istiqamətində işlər hazırda sürətlə davam etdirilir.
Prezident İlham Əliyev işğaldan azad edilmiş əraziləri - 10 min kvadratkilometr ərazini “yaşıl enerji” zonası elan edib. Burada artıq bir neçə su-elektrik stansiyası inşa edilib və fəaliyyətə başlayıb. Günəş və külək-elektrik stansiyalarının yaradılması ilə bağlı isə konkret planlar var. Bir sözlə, həmin bölgələrin potensial imkanı böyükdür. Artıq dəqiq hesablamalar aparılıb və günəş, külək enerji növlərinin istehsalı təxminən 9-10 min meqavata çata bilər. İlkin addımlar da atılır, BP şirkəti ilə generasiya gücü 200 meqavatdan çox olan günəş-elektrik stansiyasının inşası ilə bağlı danışıqlar gedir və onların uğurla nəticələnəcəyinə şübhə yoxdur. Bu bölgəyə digər böyük şirkətlər də maraq göstərirlər.
Prezidet İlham Əliyev yürütdüyü uzaqgörən və məqsədyölü siyasət onu deməyə əsas verir ki, “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” vaxtında və uğurla yerinə yetiriləcəkdir. Nə mənfur Ermənistan, nə də onun havadarları, ümumiyyətlə heç bir güc Azərbaycanın haqq işinə mane ola bilməz. Qısa zamanda həyata keçirilən genişmiqyaslı bərpa-quruculuq işləri Azərbaycan xalqının necə qurucu xalq olduğunu nümayiş etdirir.