Xəbərlər
Vətən müharibəsi şəhidinin doğum günündə xatirəsi anılıb
Biləsuvar rayonunun Yuxarı Cürəli kəndində Vətən müharibəsi şəhidi Nəcəfli Sadiq Nüsrət oğlunun doğum günü qeyd olunub.
Bu münasibətlə Yeni Azərbaycan Partiyası Biləsuvar rayon təşkilatının sədri Kamil Qurbanlı, Yuxarı Cürəli kənd ərazi partiya təşkilatının sədri Firdovsi Şərifov, partiya üzvləri şəhidin ailəsini ziyarət ediblər.
Görüşdə Sadiq Nəcəflinin şərəfli həyatı və döyüş yolu, torpağa, milli-mənəvi dəyərlərə bağlılığı, müqəddəs şəhidlik zirvəsinə ucalmasından bəhs edilib və şəhid ailəsinin qayğıları dinlənilib.
Şəhidin ailə üzvləri onlara göstərilən diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildiriblər.
Daha sonra ictimayət nümayəndələri ilə birgə şəhidin məzarı ziyarət olunub və ruhuna dualar oxunub.
Qeyd edək ki, Azərbaycan Respublikası Prezidentinin müvafiq sərəncamlarına əsasən şəhid Sadiq Nəcəfli ölümündən sonra “Vətən uğrunda”, “Cəsur döyüşçü” və “Şuşanın azad olunmasına görə” medalları ilə təltif edilib.
