Xəbərlər
Nizami rayonunda Qubadlının işğaldan azad olunması günü qazilərlə birgə qeyd edildi
Yeni Azərbaycan Partiyası Nizami rayon təşkilatında 25 oktyabr – Qubadlının işğaldan azad olunması günündə “44 günlük Vətən müharibəsi: Qazilərin xatirələrində” mövzusunda qazilər ilə gənclərin növbəti görüşü keçirilib.
Tədbir iştirakçıları öncə Vətən uğrunda canından keçmiş şəhidlərimizin xatirəsini birdəqiqəlik sükutla yad ediblər.
Sonra çıxış edən YAP Nizami rayon təşkilatının sədri Ramil Vəlibəyov, Missiya Media Qrupunun rəhbəri Ramin Əhmədov, “Missiya.az” saytının baş redaktoru Nicat Dağlar Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə aparılan 44 günlük Vətən müharibəsində qəhrəmanlıq göstərmiş yenilməz Azərbaycan Ordusunun hər bir üzvünün fədakarlıqlarından danışıblar.
Sonra qazilər Vətən müharibəsi ilə bağlı xatirələrini gənclərlə bölüşüblər.
Füzuli, Cəbrayıl, Xocavənd, Hadrut, Qubadlı uğrunda gedən döyüşlərdə iştirak etmiş, Prezident İlham Əliyevin müvafiq sərəncamları ilə müxtəlif orden və medallarla mükafatlandırılmış qazilərdən İlkin Abdullayev, Turan Məmmədov, Əlövsət Muradlı və Rüfət Əliyev keçdikləri döyüş yolu, ordumuzun şücaəti, şəhidlərimizin qəhrəmanlığı haqqında məlumat veriblər. Onlar müzəffər Ali Baş Komandan İlham Əliyevin, Birinci vitse-prezident Mehriban xanım Əliyevanın şəhid ailələrinə, qazilərə olan diqqət və qayğısından da bəhs edib, razılıq bildiriblər.
Daha sonra qazilər gəncləri maraqlandıran suallara cavab veriblər.
