Xəbərlər
Azərbaycan müstəqillik tarixinin ilk Zəfər paradını keçirir
Xatirə Əliyeva,
siyasi elmlər üzrə fəlsəfə doktoru,
Əməkdar jurnalist
Gözün aydın olsun Azərbaycan! Gözün aydın olsun Azərbaycan xalqı! Müstəqillik tariximizin ilk Zəfər paradı keçirilir. Azərbaycan tarixi Qələbəsini dünyaya nümayiş etdirir. Dövlətimizin başçısı, Ali Baş Komandan İlham Əliyevin rəhbərliyi ilə Azərbaycan Ordusunun 44 gündə yazdığı şərəfli tarix harada yaşamasından asılı olmayaraq bütün azərbaycanlıları qürurlandırır, qalib ölkənin vətəndaşı olmaqları ilə fəxr edirlər. Üçrəngli Zəfər bayrağımız bu gün işğaldan azad olunmuş bütün torpaqlarımızda dalğalanır. Azərbaycan Ordusu haqqı-ədaləti bərpa etdi, işğala son qoydu, ölkəmizin həyatında yeni mərhələ başlayır.
Azərbaycan Silahlı Qüvvələri işğalçı Ermənistana yerini göstərərək onu diz çökdürdü, kapitulyasiyaya məcbur etdi. Dövlətimizin başçısı, Ali Baş Komandan İlham Əliyevin Sərəncamına uyğun olaraq Qarabağın ürəyi, tacı olan Şuşanın işğaldan azad olunduğu gün-8 noyabr tariximizə Zəfər Günü kimi yazıldı. Bu Zəfərimizlə bağlı tədbirlər sırasında Qələbə paradının keçirilməsi tariximizə qızıl hərflərlə yazılacaq. Azərbaycanın şanlı Qələbəsinin təqdimatı olan Qələbə paradı bu günə qədər keçirilən hərbi paradlardan tamamilə fərqlənəcək. Çünki əvvəlki paradlarda məqsəd Azərbaycanın hərbi gücünü, Ordumuzun işğal altında olan torpaqlarımızı azad etmək imkanlarını, qüdrətini nümayiş etdirmək idisə, bu gün Qələbə paradında müzəffər Ordumuz qalib kimi iştirak edir. Qələbə paradı bir daha dünyaya göstərəcək ki, yalnız özünün iqtisadi və maliyyə imkanları, müstəqil siyasəti əsasında ordu quruculuğu sahəsində mühüm uğurlara imza atan Azərbaycan bir qarış torpağını belə düşmənə verməyəcəyini reallıqda nümayiş etdirdi. Sülh danışıqları səmərə vermədiyi təqdirdə hərb yolu istisna edilmirdi. Bu, təbii ki, Azərbaycan Ordusunun gücünə, qüdrətinə əsaslanırdı. Vətənpərvər, döyüş ruhlu hər bir gənc, hər bir Azərərbaycan əsgəri daim Ali Baş Komandanın hücum əmrini gözləyirdi.
Nəhayət, həmin gün gəldi və dövlətimizin başçısı, Ali Baş Komandan İlham Əliyevin qətiyyəti sayəsində Azərbaycan Ordusu Zəfər yürüşü ilə bugünkü reallıqları yaratdı. Bu gün Bakımız möhtəşəm Qələbə paradı ilə dünyanın diqqətindədir. Bundan böyük xoşbəxtlik ola bilərmi? Tarixən yenilməz, məğrur xalq kimi tanınan Azərbaycan xalqı bunu bir daha dünyaya nümayiş etdirir. Tarixinə sahib çıxan xalq məğlubedilməzdir. Azərbaycan dünyanın ən nüfuzlu təşkilatlarının tribunasından həqiqətlərimizi, dövlətimizin başçısı İlham Əliyev 44 gündə 30-a yaxın müsahibələrində düşmənin əsl simasını, yalan tarix yazıb faktları saxtalaşdırdığını əsaslı şəkildə dünyaya çatdıranda Ermənistanın həqiqətlərin qarşısında çıxılmaz vəziyyətdə qalması diplomatik müstəvidə üstünlüyümüzün göstəricisi idi. Məhz bu üstünlüklər döyüş meydanında Qələbəmizi təmin etdi, Zəfər tariximiz yazıldı. Bu paradda Azərbaycan Ordusunun 44 gündə uğurlu əks-hücum əməliyyatları nəticəsində düşmənin qənimət kimi götürülən hərbi texnikasının bir hissəsinin nümayişi də qürurvericidir. Kapitulyasiyaya məcbur edilən Ermənistan və ona havadarlıq edən dövlətlər illərdir yaratdıqları “məğlubedilməz erməni ordusu” mifinin darmadagın edildiyinin bir daha şahidi olacaqlar.
Bugünümüzün qürurverici hadisəsi işğal altında olan torpaqlarımızın öz tarixi sahibinə qayıtmasıdır. Azərbaycan tarixi Zəfərə imza atdı, şəhidlərimizin, Xocalı qurbanlarının, Gəncə, Bərdə soyqırımları zamanı həlak olan günahsız insanların qisası döyüş meydanında alındı, Bu Qələbə möhtərəm Prezidentimiz, Ali Baş Komandan İlham Əliyevin adını tarixə qalib Sərkərdə, Azərbaycan Ordusunu ən güclü Ordu kimi yazdı. Bu gün yalnız ölkə deyil, dünya mətbuatında Zəfərimizə yol açan amillər, Qələbə paradının dünyanın hərb tarxinə hansı səhifələri yazacağı geniş şərh olunur. Möhtərəm Prezidentimiz İlham Əliyevin qeyd etdiyi kimi, hər kəs gücümüzü, qüdrətimizi, iradəmizi gördü. Bundan sonra Azərbaycan yalnız inkişaf, tərəqqi yolu ilə gedəcək: “Bundan sonra da biz ordu quruculuğu işində əməli addımlar atacağıq, ordumuzu daha da gücləndirəcəyik. Bütün göstərişlər verildi. İradəmiz də var, təcrübəmiz də var - əvəzolunmaz təcrübə. İndi bütün ölkələr bu Vətən müharibəsinin təcrübəsini öyrənirlər. Vəsaitimiz də var. Xalq-iqtidar birliyimiz də var. Biz göstərmişik ki, böyük xalqıq, qürurlu xalqıq. Düşməni yerə vurduq. Düşmənin belini qırdıq, məhv etdik. Bu, tarixi Qələbədir. Bu Qələbə Azərbaycan tarixində əbədi qalacaq, şanlı Qələbə kimi!”
Azərbaycan xalqı bu gün ədalətin bərpasını bayram edir. Beynəlxalq ictimaiyyət 10 dekabr Qələbə paradında bir daha Azərbaycan xalqının öz Prezidentinin ətrafında necə yumruq kimi birləşdiyinin şahidi olacaq. İşğaldan azad olunmuş torpaqlarımızda dalğalanan üçrəngli Zəfər bayrağımız Azadlıq meydanına gətiriləcək və Qələbə paradında göstəriləcək. Bu gün böyük qürur hissi ilə deyirik ki, Füzuli bizimdir, Cəbrayıl bizimdir, Zəngilan bizimdir, Qubadlı bizimdir, Ağdam bizimdir, Laçın bizimdir, Kəlbəcər bizimdir, Şuşa bizimdir, Qarabağ bizimdir, Qarabağ Azərbaycandır! Eşq olsun Ali Baş Komandana! Eşq olsun Azərbaycan əsgərinə! Eşq olsun Azərbaycan xalqına! Yaşasın Azərbaycan!