Xəbərlər
Elman Məmmədov: Beynəlxalq birlik məsələyə ikili standartlarla yanaşmasa, münaqişəni qısa müddət ərzində həll etmək mümkündür
«Dağlıq Qarabağ münaqişənin həlli prosesində vasitəçilik edən ATƏT-in Minsk qrupu səmərəli fəaliyyət göstərməlidir». Bu fikri Milli Məclisin deputatı Elman Məmmədov deyib.
E.Məmmədov bildirib ki, həmsədrlər beynəlxalq hüquq çərçivəsində addımlar atmalıdır. Əks təqdirdə, Cənubi Qafqaz yeni qarşıdurmalar meydanına çevrilə bilər.
«ATƏT-in Minsk qrupu Ermənistana qarşı xüsusi təzyiq mexanizmi və vasitələrindən istifadə etməlidir. Bu, danışıqlar prosesində müsbət dinamikanın yaranması üçün əsas şərtdir. Əlbəttə, diplomatik vasitələrin səmərə vermədiyi son məqamda Azərbaycan öz ərazi bütövlüyünü və təhlükəsizliyini təmin etmək üçün hərbi metoda əl atacaq. Bu, Azərbaycanın beynəlxalq hüquq normaları ilə təsbit edilmiş ali siyasi hüququdur. Əlbəttə ki, əgər beynəlxalq birlik məsələyə ikili standartlarla yanaşmasa münaqişəni qısa müddət ərzində sülh yolu ilə həll etmək mümkündür. Çünki Ermənistan dərin iqtisadi böhran məngənəsindədir və çox zəif dövlətdir. Buna görə də, əgər sərt təpki olsa, onun beynəlxalq hüquqa qarşı çıxmasına cəsarəti çata bilməz. Sadəcə, işğalçı dövlətə BMT Təhlükəsizlik Şurasının qətnamələrinə əməl etməsi üçün sanksiyalar tətbiq olunması qısa müddətdə ciddi effekt verə bilər. Amma təəssüf ki, beynəlxalq birlik bunu etmir»-deyə, deputat vurğulayıb.