Xəbərlər
Sahibə Qafarova: Azərbaycan beynəlxalq münasibətlər sisteminə yeni və daha mütərəqqi dəyərlər təqdim etməkdədir
«Azərbaycan özünün balanslaşdırılmış xarici siyasət kursu ilə müasir dünyanın, xalqlararası əməkdaşlığın inkişafında və sivilizasiyalararası dialoqda mühüm rol oynayır». Bu fikri AŞPA-nın komitə sədri, Milli Məclisin deputatı Sahibə Qafarova deyib.
S.Qafarova bildirib ki, Azərbaycan əlverişli geosiyasi mövqeyi ilə yeni əməkdaşlıq platformalarının formalaşdırılmasında mühüm rol oynamaqla yanaşı, mühüm regional təşəbbüslərin reallaşdırılmasını, bölgədə təhlükəsizliyin, inkişafın təmin olunmasını mümkün edən praqmatik siyasət həyata keçirir. Onun sözlərinə görə, Münxen Təhlükəsizlik Konfransında da Azərbaycanın beynəlxalq miqyasda nüfuzu dəyərləndirilib.
«Azərbaycan Prezidenti İlham Əliyev Münxen Təhlükəsizlik Konfransı çərçivəsində Avrasiyada əməkdaşlıq və problemlər məsələlərinə həsr olunan panel-müzakirədə çıxışı zamanı qeyd edib ki, Azərbaycan Asiya ilə Avropa arasında yerləşir və bizim coğrafi mövqeyimiz, əslində, regionumuzda geosiyasi vəziyyəti müəyyən edir. Bütövlükdə, Prezident İlham Əliyev tərəfindən müasir dövrün tələbləri və reallıqlarına uyğun olaraq uğurla davam və inkişaf etdirilən praqmatik xarici siyasət kursu Azərbaycan Respublikasının milli dövlət kimi müasir beynəlxalq münasibətlər sistemində gücünü və nüfuzunu artıran amildir. Bunun nəticəsidir ki, milli dövlətlər regional və beynəlxalq təhlükəsizliyin təmin və mühafizə olunması, eləcə də səmərəli tərəfdaşlıq əlaqələrinin inkişaf etdirilməsində Azərbaycanla çoxşaxəli əməkdaşlığa müstəsna önəm verirlər. Beləliklə, öz xarici siyasətində milli maraqlar və beynəlxalq hüquq normaları ilə yanaşı, sülh, sabitlik, inkişaf, qarşılıqlı faydalı əməkdaşlıq kimi meyarları da əsas götürən Azərbaycan beynəlxalq münasibətlər sisteminə yeni və daha mütərəqqi dəyərlər təqdim etməkdədir»- deyə, S.Qafarova vurğulayıb.