Xəbərlər
Prezident İlham Əliyev: Minifutbol üzrə milli komandamızın Avropa çempionu olması digər idman növləri üçün çox gözəl nümunədir
Azərbaycanda idmanın inkişafı ilə bağlı çox işlər görülüb, ancaq bu günə qədər komanda idman növündə biz böyük uğurlara nail ola bilməmişik. Ona görə də minifutbol üzrə milli komandamızın Avropa çempionatında qazandığı qələbənin çox böyük mənası var və digər idman növləri üçün bu, çox gözəl nümunədir.
Bu fikirləri Prezident İlham Əliyev minifutbol üzrə Avropa çempionatının qalibi olan milli komandamızın üzvlərini qəbul edərkən söyləyib.
Bu tarixi uğuru təkrarlamağın heç kim üçün asan olmayacağını qeyd edən dövlətimizin başçısı deyib: “Amma hər halda biz çalışmalıyıq ki, təkcə fərdi idman növlərində deyil, eyni zamanda, komanda idman növlərində də Azərbaycan idmançıları beynəlxalq yarışlarda yüksək nəticələr göstərsinlər. Bildiyiniz kimi, fərdi idman növlərində isə bizim çox böyük uğurlarımız var, Olimpiya, dünya, Avropa çempionlarımızın sayı çoxdur və əminəm ki, artacaq. Beləliklə, komanda idman növlərinin inkişafı imkan verəcək ki, idmanın inkişafı hərtərəfli olsun”.