Xəbərlər
Şuşa Bəyannaməsi Azərbaycanın siyasi, diplomatik və iqtisadi uğurudur
Mansur Quliyev
Yeni Azərbaycan Partiyası Ağdam rayon təşkilatının sədri
Azərbaycan tarixində əlamətdar gün kimi qalacaq əlamətdar tarixi hadisələrdən biridə 15 iyun 2021-ci il tarixdə mədəniyyət beşiyimiz sayılan Şuşa şəhərində iki qardaş dövlət arasında imzalanan “Şuşa Bəyannaməsi”dir. Bu tarixi hadisə nəinki Azərbaycan və Türkiyənin həmçinin bütün Türk dünyasının həmrəylik təməli və təntənəsi deməkdir. Milli dövlətçilik tariximizdə mühüm əhəmiyyət kəsb edən, Azərbaycan Respublikası ilə Türkiyə Respublikası arasında müttəfiqlik münasibətləri haqqında Bəyannamənin imzalanması iki qardaş ölkənin birliyinin və sarsılmazlığının əsas göstəricisidir. Hər iki ölkənin ümummilli maraqlarının qorunmasında xüsus əhəmiyyət kəsb edən, eləcə də regional və beynəlxalq strateji məsələlərdə birgə fəaliyyətlərinin qurulmasına istiqamətlənən Şuşa Bəyannaməsi Azərbaycan və Türkiyənin başçılığı altında regionda yeni reallıqların, sülhün və təhlükəsizliyin təməlini təşkil edir.
Tarixə nəzər salanda Azərbaycanla Türkiyənin dostluq və qardaşlıq münasibətlərinin qədim dövrlərə təsədüf etdiyinin şahidi olarıq. Beləki düz yüz il əvvəl imzalan tarixi Qars müqaviləsi və bu müqavilənin iki qardaş xalq üçün önəmi hər kəsə yaxşı məlumdur. Həmçinin yüz il əvvəlki tarixə nəzər salsaq, 1918-ci il iyunun 4-də Batumda Osmanlı Türkiyəsi ilə Azərbaycan Respublikası arasında dostluq müqaviləsinin imzalanmasıda söylədiklərimizə bariz nümunədir. Tarix təkrarlandı və yenə Azərbaycan Türkiyə birliyi və qardaşlığı yeni bir dönəmə keçid etdi. Bu gün ki reallıq ondan ibarətdir ki, Azərbaycan və Türkiyə arasında əlaqələrin yüksək səviyyəsi ümumilikdə regionun tərəqqisinə, bölgədə sülhün və sabitliyin bərqərar olmasına mühüm töhfələr verir. Qeyd etmək lazımdı ki, 44 günlük şanlı Vətən Müharibəsi zamanı qardaş Türkiyənin dövlətimizə verdiyi siyasi-mənəvi dəstəyin hər birimiz şahidi olduq. Xüsusən Türkiyə Prezidenti Rəcəb Tayyib Ərdoğanın Bakıda Azadlıq meydanında keçirilən Zəfər paradında Azərbaycan Respublikasının Prezidenti cənab İlham Əliyevlə yan-yana dayanması hər bir Azərbaycan vətəndaşında böyük qürur və fəxarət hissi yaratdı.
Tarixi Şuşa Bəyannaməsinin əhəmiyyəti ondan ibarətdir ki, bu gün Azərbaycan və Türkiyə arasında olan müttəfiqlik və dosluq əlaqələri ən yüksək səviyyəyə qalxmış oldu və bütün dünya iki qardaş ölkənin birliyinin sarsılmaz olduğunun şahidi oldu.
Azərbaycan Türkiyə dostluğu və qardaşlığı bundan sonrada əbədi olaraq yaşayacaq və yeni -yeni birgə uğurlara, zəfərlərə imza atacaqdır.