Xəbərlər
Müşfiq Cəfərov: Müharibənin yenicə başa çatdığı regionda gərginlik heç bir ölkənin marağına uyğun deyil
«Zaman-zaman İranın Azərbaycan əleyhinə təxribata əl atdığı artıq rəsmi səviyyədə də müzakirə edilib. 44 günlük İkinci Qarabağ müharibəsindən sonra İranın Azərbaycana qarşı aqressiyası daha açıq şəkildə özünü büruzə verir. Həmçinin, regionda baş verən geosiyasi dəyişikliklərin, Azərbaycanın İkinci Qarabağ müharibəsi nəticəsində işğal altında olan torpaqlarını azad və İran-Azərbaycan sərhəddində nəzarəti bərpa etməsi rəsmi Tehranın maraqlarına cavab vermir.»
Bu fikirləri Milli Məclisin deputatı Müşfiq Cəfərov bildirib.
M.Cəfərov qeyd edib ki, Ermənistan Azərbaycan torpaqlarını işğal altında saxladığı müddətdə İran həmin ərazilərdə qanunsuz fəaliyyət də göstərib: «İran hakimiyyəti hər zaman ermənipərəst mövqeyini qabarıq şəkildə büruzə verib. 30 illik işğal dövründə İranın separatçı qurumla işbirliyinə, işğal altındakı Azərbaycan ərazilərində birgə qeyri-qanuni fəaliyyətlə məşğul olmasına dair saysız-hesabsız faktlar mövcuddur.»
«Azərbaycan daim İranla sıx qonşuluq və tərəfdaşlıq münasibətlərinə səy göstərərək bir sıra mühüm regional layihələrdə bu ölkə ilə tərəfdaşdır. Lakin rəsmi Tehran bütün qonşuluq, vahid din birliyi məsələsini unudaraq Azərbaycan hökümətinin ona qarşı humanist dəyərlərinə qarşılıq olaraq təxribatlara əl atır. İranın Azərbaycana bu cür yanaşma nümayiş etdirməsinin səbəblərindən biri də İsrail ilə əlaqələrimizin yüksək səviyyədə olmasıdır. Amma onu da qeyd edək ki, müharibənin yenicə başa çatdığı regionda gərginlik heç bir ölkənin marağına uyğun deyil»,- deyə millət vəkili vurğulayıb.