Xəbərlər
Rauf Əliyev: Siyasi partiyalar arasında keçirilən görüşlərin, dialoqların böyük əhəmiyyəti var
«Azərbaycan Prezidenti Administrasiyasının İctimai-siyasi məsələlər şöbəsinin müdiri Əli Həsənov başda olmaqla iqtidar və müxalifət partiyalarının nümayəndələri arasında başlanmış dialoq cəmiyyət arasında böyük razılıq hissi ilə qarşılanıb. Cəmiyyətin bütün sahələrini əhatə edən müxtəlif problemlərin bir arada müzakirə edilərək həll edilməsi üçün yolların müəyyən edilməsi mühüm əhəmiyyətə malikdir". Bu sözləri Milli Məclisin deputatı Rauf Əliyev deyib.
R.Əliyev bildirib ki, Prezident İlham Əliyev dəfələrlə ölkədə əhalinin sosial rifahının yüksəlməsi, iqtisadi islahatların aparılması ilə yanaşı davamlı olaraq siyasi islahatların da aparılmasının zəruriliyinin vurğulayıb. Onun sözlərinə görə, bu nöqteyi- nəzərdən iqtidar və müxalifət partiyaları arasında keçrilən görüşlərin, dialoqların böyük əhəmiyyəti vardır.
«Görüşdə cənab Əli Həsənov bildirib ki, siyasi partiyalarla, vətəndaş cəmiyyəti, instutları ilə əməkdaşlıq şəraitində işləyən hakimiyyətlər güclü olur. Azərbaycan iqtidarı belə dialoqlara, görüşlərə həmişə hazırdır. Arzu edirik ki, başlanmış dialoqda Azərbaycanın ictimai-siyasi həyatında iştirak edən bütün partiyalar iştirak etsinlər. Belə dialoqlarda, görüşlərdə iştirak etməyən partiyalar bilməlidirlər ki, bu onların öz nüfuzlarına xələl gətirəcək və onlar ölkədəki siyasi proseslərdən geri qalacaqlar. Ancaq qarşılıqlı dialoq, müzakirələr nəticəsində respublikamızın ictimai-siyasi həyatı üçün mühüm əhəmiyyət kəsb edən məsələlərin optimal həlli yollarını müəyyənləşdirmək olar. İnanırıq ki, bu belə də olacaq»- deyə, R.Əliyev vurğulayıb.