Partiya xəbərləri
YAP-ın rayon və şəhər təşkilatları sədrlərinin bələdiyyə seçkilərinə hazırıqla əlaqədar ümumrespublika müşavirəsi keçirilmişdir
Noyabrın 29-da Yeni Azərbaycan Partiyasının rayon və şəhər təşkilatları sədrlərinin bələdiyyə seçkilərinə hazırıqla əlaqədar ümumrespublika müşavirəsi keçirilmişdir.
Müşavirədə dekabrın 23-də keçiriləcək bələdiyyə seçkilərinin təbliğat-təşviqat kampaniyasının yüksək səviyyədə təşkil edilməsi ilə bağlı məsələlər müzakirə edilmişdir.
Qeyd edilmişdir ki, YAP bələdiyyə seçkiləri kampaniyasının ötən mərhələlərini uğurla başa vurub, imzatoplama prosesini yüksək fəallıqla həyata keçirib. Seçki qərargahının və partiyanın yerli strukturlarının səmərəli fəaliyyəti nəticəsində partiya tərəfindən irəli sürülən təxminən 15 min nəfər partiya üzvü dairə seçki komissiyaları tərəfindən bələdiyyə üzvlüyünə namizəd kimi qeydiyyata alınıb.
Müşavirədə partiyanın yerli strukturlarının qarşıda duran vəzifələrin yerinə yetirilməsi məqsədilə səfərbər edilməsi və seçki kampaniyasının yüksək səviyyədə keçirilməsi üçün digər zəruri tapşırıq və tövsiyyələr verilmişdir.
Müzakirələrdə belə bir əminlik ifadə olunmuşdur ki, YAP tərəfindən irəli sürülən namizədlər qarşıdan gələn bələdiyyə seçkilərində seçicilərin yüksək etimadını qazanacaq və növbəti mərhələdə də partiyamzı təmsil edən nümayəndələr regionlarda fəaliyyət göstərən bələdiyyələrin işində, yerli məsələlərin həllində yaxından iştirak edəcəklər.