Xəbərlər
Türkiyəli deputat: Xocalı dəhşətlərini sükutla qarşılamaq yolverilməzdir
Xocalı faciəsi XX əsrdə insanlığa qarşı törədilən ən ağır cinayətdir. Belə cinayətlərin bir daha törədilməməsini arzulayırıq.
Bu fikirləri Türkiyə-Azərbaycan parlamentlərarası dostluq qrupunun rəhbəri Necdet Ünüvar bildirib. Deputat deyib ki, Xocalı faciəsinin dəhşətləri heç zaman yaddaşlardan silinməyəcək. Bu cinayəti törədənlər ədalət mühakiməsi qarşısında cavab verməlidirlər. Xocalıda insanlara qarşı xüsusi amansızlıq göstərilib. Cəsədlər təhqir olunub, əsir və girovlar işgəncələrə məruz qalıblar. Bu cinayətin bütün təfərrüatları dünya ictimaiyyətinə olduğu kimi çatdırılmalıdır ki, gələcək nəsillər sülh və əmin-amanlıq uğrunda daha mübariz olsunlar. Xocalıda törədilənlərə göz yummaq və yaxud onun dəhşətlərini sükutla qarşılamaq yolverilməzdir. Azərbaycan və Türkiyə xalqları həmişə qonaqpərvərliyi və humanistliyi ilə seçilib. Etdiyimiz yaxşılıqların qarşılığında qanımızı tökən cinayətkarların mühakimə olunmasını tələb edirik”.