YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

Azərbaycanla İran arasında dörd sənəd imzalanıb

İran İslam Respublikasının rabitə və informasiya texnologiyaları naziri Mahmud Vaezinin Bakıya səfəri çərçivəsində iki ölkə arasında dörd sənəd imzalanıb.

İmzalanma mərasimindən öncə Azərbaycan Respublikasının iqtisadiyyat naziri Şahin Mustafayevlə İran İslam Respublikasının rabitə və informasiya texnologiyaları naziri Mahmud Vaezi ölkələrimiz arasında mövcud olan əməkdaşlıq məsələlərini müzakirə ediblər.

Nazir Şahin Mustafayev Azərbaycanla İran arasında strateji və dostluq əlaqələrinin möhkəmliyini qeyd edərək Azərbaycan və İran dəmir yollarının əlaqələndirilməsi haqqında Hökumətlərarası Çərçivə Sazişinə və Azərbaycan-İran dövlət sərhədində Astara çayı üzərində dəmir yolu körpüsünün tikintisi haqqında müqaviləyə uyğun olaraq Astara çayı üzərində dəmir yolu körpüsünün təməli qoyulduğunu xatırladıb.

Nazir iki ölkə arasında turizm və nəqliyyat sektorunun inkişafı üçün görüləcək işlərin hər iki ölkəyə müsbət təsirindən danışıb. Astaraçay üzərində dəmir yolu körpüsünün ilin sonunadək yekunlaşacağını deyən Ş.Mustafayev, dəmir yolunun inşasının da həmin vaxt başa çatacağını söyləyib. Bildirib ki, görüləcək işlər həm xalqlar arasında, həm də siyasi müstəvidə əlaqələrin inkişafına daha dərin töhfə verəcək.

İran İslam Respublikasının rabitə və informasiya texnologiyaları naziri Mahmud Vaezi iki ölkə arasında bank sektorunda əlaqələrin qurulmasından danışıb. M.Vaezi bildirib ki, sənaye sahəsində əlaqələrin inkişafı üçün yaradılan imkan özəl sektor nümayəndələrinə dəstək olacaq. Biz hər kəsə göstərəcəyik ki, neftin qiymətinin azaldığı bir vaxtda Azərbaycanla İran birlikdə iqtisadiyyatın inkişafı üçün mühüm işlər görür.

“Başqa sahələr kimi səhiyyə sahəsində də Azərbaycanla İran mühüm işlər görə bilər. Hər iki ölkənin şirkətləri qarşılıqlı olaraq bu ölkələrdə fəaliyyət göstərməlidir və biz Xəzər dənizinin enerji resurslarından istifadə etmək üçün işlər görməliyik”, - deyə M.Vaezi vurğulayıb.

Görüşdə Azərbaycan və İran şirkətləri arasında Anlaşma Memorandumları imzalanıb.

“Azərbaycan İnvestisiya Şirkəti” ASC, “Azərsun Holdinq” MMC və İranın “Darou Pakhsh” şirkəti arasında Azərbaycanda əczaçılıq məhsullarının beynəlxalq standartlara uyğun istehsalının təşkili haqqında Anlaşma Memorandumu imzalanıb. Sənədə əsasən, yeni yaradılacaq birgə müəssisəni “Azərbaycan İnvestisiya Şirkəti” ASC, “Azərsun Holdinq” MMC və “Darou Pakhsh” şirkəti birgə maliyyələşdiriləcək.

Müəssisədə ağrıkəsici, antibiotik və vitamin təyinatlı 52 adda dərman preparatlarının istehsalı nəzərdə tutulur. Dərman preparatları ilkin olaraq daxili bazar üçün nəzərdə tutulur. Müəssisənin Sumqayıt Kimya Sənaye Parkının ərazisində yaradılması planlaşdırılır.