MÜSAHİBƏLƏR
Azad mətbuatın inkişafı jurnalist məsuliyyətini daha da artırır
- Vüqar müəllim, milli mətbuatımızın 141 illiyi tamam olur. Təbii ki, mətbuatımızın inkişaf tarixindən bəhs edərkən, dövlət müstəqilliyimizin bərpasından sonrakı dövr daha çox xarakterizə edilir. Müstəqillik tariximizin 25 ili Azərbaycan mətbuatında hansı mühüm hadisələrlə yadda qalıb?
- Öncə bütün media nümayəndələrini Milli Mətbuat Günü münasibətilə təbrik edir, onlara yeni-yeni yaradıcılıq uğurları arzulayıram. Bayram günlərində keçdiyimiz yola nəzər salıb, gələcəyimiz üçün bir nəticə əldə etmək bir ənənəyə çevrilib. 25 illik müstəqillik tariximizin ilk əvvəllərində yaşananlar hər birimizə məlumdur. Ölkədə xaos, anarxiya, özbaşınalıq, iqtisadi böhran, torpaqlarımızın işğalı və s kimi xalqın gələcəyə ümidini itirən məqamlar həmin illərin səciyyəvi xüsusiyyəti idi. Dahi şəxsiyyət Heydər Əliyev belə çətin məqamda xalqın təkidli tələbi ilə hakimiyyətə qayıtdı. Bu qayıdış digər sahələr kimi mətbuatın da inkişaf tarixində yeni bir mərhələnin təməlini qoydu. Məhz ölkəmiz müstəqillik əldə etdikdən sonra hər il iyul ayının 22-si, yəni, ilk milli mətbuatımız olan «Əkinçi» qəzetinin işıq üzü gördüyü tarix Milli Mətbuat Günü kimi qeyd olunur. Azərbaycanın 25 illik müstəqillik tarixinin 1993-cü ilin iyun ayından başlanan inkişaf yolundan bəhs edərkən bu fikri böyük fəxr və inamla qeyd edirik ki, bu tərəqqinin, inkişafın möhkəm təməli məhz ulu öndər Heydər Əliyevin hakimiyyətinin birinci dövründə, 1969-1982-ci illərdə qoyulub. Həmin dövrlərdə mətbuat azad olmasa da, bütün kütləvi informasiya vasitələri vahid ideoloji xəttə xidmət edib bu çərçivədən kənara çıxmasa da reallıqlardan biri bu idi ki, həmin dönəmdə ümummilli lider Heydər Əliyevin fəaliyyəti nəticəsində Azərbaycanda mətbuatın maddi-texniki bazası möhkəmləndirildi, yeni peşəkar jurnalist nəsli formalaşdırıldı. Bu möhkəm təməl Azərbaycan dövlət müstəqilliyini yenidən bərpa etdikdən, daha dəqiq desək, ümummilli lider Heydər Əliyev 1993-cü ildə xalqın təkidli tələbi ilə ikinci dəfə hakimiyyətə qayıtdıqdan sonra növbəti uğurların əldə olunmasında çox mühüm rol oynadı. Təbii ki, möhkəm təməl üzərində qurulan binanın növbəti mərtəbələrini ucaltmaq çətin deyil. Bu gün həmin binanın ən yüksək mərtəbələrini görməyimizdən qürur hissi keçiririk. Əsas budur ki, cəmiyyətin güzgüsü olan mətbuat bu reallıqları olduğu kimi, heç bir qərəzə yol vermədən, obyektiv şəkildə ictimaiyyətə çatdırsın.
Dövlətimizin başçısı möhtərəm İlham Əliyevin «Bu gün ölkəmizin artan imkanları kütləvi informasiya vasitələrinin, o cümlədən milli mətbuatımızın inkişafı üçün kompleks tədbirlərin həyata keçirilməsinə şərait yaratmışdır. Kütləvi informasiya vasitələrinə dövlət dəstəyinin əsas məqsədi müstəqil, peşəkar, rəqabətədavamlı, eyni zamanda, milli şüur və vətənpərvərlik prinsiplərinə dönmədən əməl edən media resurslarının formalaşdırılmasıdır. Qlobal informasiya məkanının beynəlxalq ictimai rəyə təsirinin gücləndiyi müasir dövrdə mətbuatımız Azərbaycan xalqının maraqlarını daim müdafiə etməli, cəmiyyətimizin tərəqqisinə, dövlətimizin nüfuzunun daha da yüksəlməsinə öz töhfəsini əsirgəməməlidir» fikri Azərbaycan mətbuatının dünəninə, bu gününə və gələcəyinə bir baxış, qarşıda duran vəzifələrin müəyyənləşdirilməsi üçün əsasdır. Əvvəldə də qeyd etdiyim kimi, tarixin yaddaşı, zamanın hakimliyi fonunda bu fikri böyük inam və qətiyyətlə qeyd edə bilərik ki, Azərbaycan mətbuatı bu gün inkişafın yeni mərhələsini yaşayır. 1993-cü ildə xalqın təkidli tələbi ilə hakimiyyətə qayıdan ulu öndər Heydər Əliyevin Fərmanı ilə senzuranın ləğvi demokratik, dünyəvi və sivil dövlət quruculuğu yolunu tutan Azərbaycanın inkişaf strategiyasına uyğun olaraq bugünkü inkişaf yolumuza işıq salmaqdadır. Bir sözlə, azad mətbuatın inkişafına əngəl yaradan süni məhdudiyyətlərin aradan qaldırılması, qanunvericiliyin təkmilləşdirilməsi və beynəlxalq standartlara uyğunlaşdırılması, KİV-lərin maddi-texniki bazasının möhkəmləndirilməsi, mətbuat işçiləri ilə mütəmadi görüşlər ənənəsinin yaradılması, KİV-lərlə bağlı problemlərə operativ və prinsipial müdaxilə edərək həllinə nail olunması ulu öndər Heydər Əliyevin azad sözə və jurnalist əməyinə münasibətini səciyyələndirən faktlardır. Məhz bu diqqət və qayğının nəticəsi olaraq, ulu öndər Heydər Əliyev 2002-ci ildə «Jurnalistlərin dostu» mükafatına layiq görülmüşdür. Son 13 ildə Heydər Əliyev siyasətini və ənənələrini müasir dövrün tələblərinə uyğun uğurla davam etdirən ölkə Prezidenti cənab İlham Əliyev cəmiyyət həyatında mətbuatın rolunu yüksək dəyərləndirərək bildirir ki, hüquqi dövləti mətbuatsız təsəvvür etmək qeyri-mümkündür. Ən əsası bu vacib məqam önə çəkilir ki, müasir dünyada inkişaf etmiş ölkələrdə azad medianın səviyyəsi hər bir ölkənin səviyyəsini göstərir. Azərbaycanın qarşısında isə gələcəkdə inkişaf etmiş ölkələrin sırasına daxil edilməsi kimi mühüm bir vəzifə durur. Belə olan halda Azərbaycanda media ilə bağlı məsələlər ən yüksək səviyyədə öz həllini tapmalıdır. Bu, möhtərəm Prezidentimiz İlham Əliyevin mətbuatın qarşısına qoyduğu əsas tələblərdəndir.
Keçilən yolun təhlili əsasında Azərbaycanı inkişaf etmiş ölkələr sırasında görmək istəyimizin reallıq olduğunu daha aydın görürük. Ulu öndər Heydər Əliyevin müstəqil Azərbaycana rəhbərliyi illərində həyata keçirdiyi çoxşaxəli islahatların və onların son on üç ildə möhtərəm Prezidentimiz İlham Əliyev tərəfindən uğurla davam etdirilməsinin nəticəsi olaraq bu gün ölkəmizdə söz və mətbuat azadlığı sahəsindəki mövcud vəziyyət qabaqcıl demokratik ölkələrlə müqayisə edilə bilər. Azərbaycan KİV-lərin sayına görə MDB və Şərqi Avropa ölkələri arasında lider mövqedə dayanır. Ölkəmizdə 4 minə yaxın kütləvi informasiya vasitəsi dövlət qeydiyyatına alınıb. Xeyli sayda jurnalist təşkilatları və ictimai birliklər fəaliyyət göstərir. Sürətlə inkişaf edən internet resursları vətəndaş cəmiyyəti quruculuğunun fəal iştirakçısına çevrilərək cəmiyyətimizin informasiyaya olan ehtiyacının ödənilməsində əhəmiyyətli rol oynayır. Ölkəmizdə internet azaddır, heç bir məhdudiyyət yoxdur. İnternet istifadəçilərinin sayı 75 faizdən çoxdur. Son 13 ilin mühüm hadisələri sırasında 2005-ci ildə «Azərbaycan mətbuat işçilərinin təltif edilməsi haqqında», «Azərbaycan mətbuat işçilərinə fəxri adların verilməsi haqqında», «Kütləvi informasiya vasitələrinə maliyyə yardımı göstərilməsi haqqında» sərəncamları xüsusi qeyd etməliyik. Həmin ildə mətbuatın 130 illik yubileyinin respublikanın bütün bölgələrində yüksək səviyyədə qeyd olunması, jurnalistlərin fəxri adlarla mükafatlandırılması mətbuata diqqət və qayğının göstəricilərindəndir. Azərbaycan milli mətbuatının 135 və 140 illik yubileyləri də dövlət başçısının biri-birindən əhəmiyyətli sərəncamları ilə yadda qaldı. Belə ki, möhtərəm Prezidentimiz cənab İlham Əliyevin sərəncamları əsasında kütləvi informasiya vasitələrinə birdəfəlik maliyyə yardımının göstərilməsi, onlarla jurnalistin fəxri adlar və «Tərəqqi» medalı ilə təltif edilməsi, mətbuat işçilərinin mənzil-məişət şəraitinin yaxşılaşdırılması və onlar üçün yaşayış evlərinin tikilməsi məqsədilə dövlət büdcəsində nəzərdə tutulmuş Azərbaycan Respublikası Prezidentinin Ehtiyat Fondundan Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fonduna maliyyə vəsaitinin ayrılması media ictimaiyyətinin rəğbətlə qarşıladığı mühüm hadisələr sırasındadır. Milli mətbuatın 138 illiyində dövlətimizin başçısı cənab İlham Əliyevin iştirakı ilə jurnalistlər üçün tikilən ilk bina istifadəyə verildi. Mərasimdə dövlətimizin başçısı cənab İlham Əliyevin söylədiyi «Bildiyiniz kimi, bu evdə mənzil alan jurnalistlərin arasında müxtəlif mətbu orqanların nümayəndələri, müxtəlif siyasi baxışlara malik olan insanlar vardır. Bu da təbiidir və bu təşəbbüs, burada aparılan bölgü bir daha göstərir ki, Azərbaycanda heç bir sahədə ayrı-seçkiliyə yol verilmir və yol verilməməlidir. Məhz buna görə hesab edirəm ki, cəmiyyətdə çox sağlam ab-hava vardır. Əlbəttə ki, jurnalistlərin peşəkarlığı, onların ictimai rəydəki fəaliyyəti bu sağlam ab-havanı daha da sağlam edəcəkdir» fikirləri ölkəmizdə mətbuatın azad, müstəqil olmasının, ən əsası hansı mövqedə olmasından asılı olmayaraq bütün mətbu orqanlara eyni yanaşmanın təsdiqidir. Möhtərəm Prezidentimiz İlham Əliyevin 2008-ci il 31 iyul tarixli «Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası»nın təsdiq edilməsi haqqında Sərəncamı, bu sənədə uyğun olaraq dövlət başçısının 3 aprel 2009-cu il tarixli Sərəncamı əsasında Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılması da azad mətbuatın inkişafına xidmət edən addımların əsas tərkib hissələrindəndir.
Məhz bu diqqət və qayğının nəticəsi olaraq dövlətimizin başçısı İlham Əliyev iki dəfə «RUH» Azərbaycan Jurnalistləri Müdafiə Komitəsinin keçirdiyi sorğuya əsasən «Jurnalistlərin dostu» mükafatına layiq görülüb. «Jurnalistlərin dostu olmaq mənim üçün böyük şərəfdir» söyləyən möhtərəm Prezidentimiz İlham Əliyev bildirir ki, aldığı bu mükafatdan asılı olmayaraq, bundan sonra da Azərbaycanda bu sahədə daha da böyük addımlar atılacaq: «Ölkədə müasir jurnalistikanın formalaşması işində Azərbaycan dövləti və Prezident kimi mən səylərimi əsirgəməyəcəyəm.» Ölkə Prezidenti bir daha təsdiqləyir ki, dövlətimiz demokratiyanın əsas atributlarından olan söz və məlumat azadlığının inkişaf etdirilməsində, KİV-lərin iqtisadi müstəqilliyinin gücləndirilməsində, ölkədə azad və plüralist medianın inkişafında maraqlıdır və qarşısında duran vəzifələri tam məsuliyyətlə və yüksək səviyyədə yerinə yetirir.
- Heç şübhəsiz ki, ölkəmizin sürətlə inkişaf etdiyi, demokratikləşmə prosesinin dərinləşdiyi, cəmiyyət həyatının bütün sahələrinin yeniləşdiyi müasir dövrdə milli mətbuatımızın qarşısında yeni vəzifələr durur. Mətbuat orqanları dövlətçiliyimizin inkişafına xidmət missiyalarını hansı səviyyədə yerinə yetirirlər?
- Azərbaycanın 25 illik müstəqillik tarixinin bələdçisi olan mətbuat bu yolun heç də hamar olmadığının şahididir. Təbii ki, Azərbaycanın müstəqilliyini yenidən bərpa etdiyi ilk illərlə bu günü müqayisə etdikdə müstəqilliyin saxlanılmasının, qorunmasının onun əldə edilməsindən nə qədər çətin olduğunu görürük. Bu gün Azərbaycan özünün unikal inkişaf modeli ilə dünyanın diqqətindədir. Etibarlı tərəfdaş kimi mövqeyini günbəgün möhkəmləndirir. Dünyanın ən islahatçı, xoşbəxt ölkəsi, Cənubi Qafqaz regionunun parlayan ulduzu kimi tanınır və nüfuz qazanır. Hər zaman bu tələb öz aktuallığını saxlayır ki, ictimai fikrə təsir imkanları böyük olan yazılı və elektron KİV-lər ictimaiyyətin gözləntilərini hansı səviyyədə yerinə yetirdiklərini düşünməli, hər gün özünə hesabat verməlidir. Cəmiyyətin informasiya tələbatını yalan, qərəzli, heç bir mənbəyə əsaslanmayan məlumatlarla ödəməyə çalışan mətbu orqana inamdan danışmaq qeyri-mümkündür. Mətbuatın əsas prinsipləri obyektivlik, qərəzsizlik, vətənpərvərlik olmalıdır. Bu üç amilin vəhdətliyi əsasında daha dolğun, ölkənin bu günü və gələcəyi üçün daha önəmli məsələlərin müzakirəsinə və həllinə xidmət edən yazıları oxucuya çatdırmaq, verilişləri tamaşaçıya təqdim etmək olar. Amma çox təəssüflər olsun ki, bu prinsipləri fəaliyyətlərində arxa plana keçirən mətbuat orqanları vardır. Dövlətimizin başçısı cənab İlham Əliyevin bildirdiyi kimi, ölkə daxilində təbii ki, müxtəlif baxışlar, müxtəlif siyasi meyillər vardır. Burada müzakirələr təbiidir. Hər bir normal cəmiyyətdə bu, olmalıdır. Ancaq biz dövlət maraqlarımızı üstün tutmalı, dövlətçiliyimizin inkişafına öz töhfəmizi verməliyik. Bu baxımdan jurnalist peşəkarlığı, ən əsası onun vətənpərvərlik duyğuları əsasdır. 2014-cü ilin avqustun əvvəlində Ermənistan-Azərbaycan dövlət sərhədində və qoşunların təmas xəttində müşahidə olunan gərginlik bəzi kütləvi informasiya vasitələrinin, xüsusilə internet resurslarının qanunvericiliyin tələblərinə zidd və qeyri-peşəkar fəaliyyətini, habelə aidiyyəti dövlət orqanlarının informasiyanın verilməsinə məsul olan struktur bölmələrinin öz funksiyalarını lazımi səviyyədə yerinə yetirə bilməməsini açıq nümayiş etdirmişdir. Həmin ərəfədə Azərbaycan Respublikası Prezidenti Administrasiyasının rəhbəri, akademik Ramiz Mehdiyevin yanında dövlət orqanlarının informasiyanın verilməsinə məsul struktur bölmələrinin və kütləvi informasiya vasitələri rəhbərlərinin müşavirəsində də cəbhə xəttində vəziyyət barədə yanlış məlumatlar, hərbi hissələrimizin dislokasiyası və hərəkəti, həlak olmuş hərbçilərin sayının süni şəkildə şişirdilməsi və bu mövzuda müxtəlif spekulyativ informasiyaların yayılması, cəbhə bölgəsində yaşayan əhali və ölkə ictimaiyyəti arasında çaşqınlıq yaratmaq cəhdləri, düşmənin maraqlarına xidmət edən məlumatların sızdırılması və s. barədə konkret faktlar göstərilərək, xəbərdarlıq edilmişdir. Bildirilmişdir ki, dövlətin hərbi, xarici-siyasi, iqtisadi, kəşfiyyat, əks-kəşfiyyat və əməliyyat-axtarış fəaliyyəti ilə bağlı, dövlət tərəfindən mühafizə edilən və yayılması Azərbaycanın təhlükəsizliyinə ziyan vura bilən məlumatlar dövlət sirri kateqoriyasına şamil edilir və onların ictimailəşdirilməsi qanuna müvafiq məsuliyyət yaradır. Dövlətimizin başçısı cənab İlham Əliyevin «Azərbaycan Respublikası Silahlı Qüvvələrinin Ermənistan Respublikası Silahlı Qüvvələri ilə təmas xəttində bəzi təhlükəsizlik tədbirləri haqqında» Sərəncamında da bildirilir ki, əsassız, ictimai rəyi əks etdirməyən təxribat xarakterli məlumatların qarşısının alınmasında güclü vasitə olan informasiya təhlükəsizliyinin təminatı Azərbaycan həqiqətlərinin olduğu kimi dünyaya çatdırılması baxımından daha önəmlidir.
Təbii ki, bu günümüzün əsas çağırışlarından biri informasiya təhlükəsizliyinin təmin edilməsidir. Dövlətin, cəmiyyətin və vətəndaşların həyatında informasiyanın, informasiya resurslarının və texnologiyalarının rolunun artması informasiya təhlükəsizliyi məsələlərini hər zaman öndə saxlayır. Möhtərəm Prezidentimiz İlham Əliyevin «İnformasiya təhlükəsizliyi sahəsində fəaliyyətin təkmilləşdirilməsi haqqında» Fərmanı bu sahədə mövcud problemlərin həllində mühüm mexanizmdir.
Daim bu reallıq qeyd edilir ki, hər bir demokratik cəmiyyətdə müxalifətin olması mütləqdir. Amma müxalifətçilik dövlət maraqlarına, xalqın mənafeyinə zidd addımların atılması kimi qəbul olunmamalıdır. Bir məqamı unutmayaq ki, hansı sahədə çalışmağımızdan, siyasi əqidəmizdən, mənsubiyyətimizdən asılı olmayaraq hər birimiz bu ölkənin vətəndaşıyıq. Vətəndaşlıq təəssübkeşliyini qorumalı, bir vətəndaş olaraq üzərimizə düşən vəzifəni yüksək səviyyədə yerinə yetirməyə çalışmalıyıq. Həqiqət çarçısı olan mətbuat dövlətçilik maraqlarını hər şeydən üstün tutmalı, Azərbaycan reallıqlarının ölkə və dünya ictimaiyyətinə olduğu kimi çatdırılmasına öz töhfəsini verməlidir. Bir məqamı da unutmayaq ki, informasiya bolluğunda daha dəqiq və keyfiyyətli informasiyanın seçimi çətinlik yaratdığından, bu informasiyanın ictimai fikrə müsbət və mənfi təsirinin fərqində olmalıyıq.
- Vüqar müəllim, mətbuatın inkişafında əsas amillərdən biri də jurnalist peşəkarlığının və məsuliyyətinin artırılmasıdır. Bu istiqamətdə görülən tədbirləri necə dəyərləndirirsiniz?
- Dövlətimizin başçısı cənab İlham Əliyev çıxışlarında daim jurnalist peşəkarlığına və məsuliyyətinə xüsusi diqqət yönəldir. Möhtərəm Prezidentimizin jurnalistlər üçün tikilmiş binada mənzillərin paylanması mərasimində söylədiyi fikirləri bir daha xatırlatmaq istərdim: « Jurnalistlərin məsuliyyəti də əlbəttə ki, daim müzakirə mövzusudur. Xüsusilə azad mətbuat olan halda jurnalistlərin məsuliyyəti ön plana çıxır. Mən şadam ki, son illər ərzində bu istiqamətdə müsbətə doğru irəliləyiş vardır, jurnalistlər öz məsuliyyətini daha da dolğun şəkildə dərk edirlər, mətbuatda gedən, həqiqəti əks etdirməyən təhqiramiz yazılara da az-az rast gəlmək olur. Bu da jurnalistlərin məsuliyyətindən xəbər verən amillərdir. Eyni zamanda, müasir cəmiyyətdə, internet dövründə hər hansı bir yalan məlumatın ömrü uzun ola bilməz. Ona görə jurnalistlərin məsuliyyəti hesab edirəm ki, gələcəkdə də daim diqqət mərkəzində olmalıdır. Bilirəm ki, jurnalist ictimaiyyəti, Mətbuat Şurası bu məsələləri daim diqqət mərkəzində saxlayır. Necə ki, hər bir insan qanun qarşısında, cəmiyyət qarşısında məsuliyyət daşıyır, əlbəttə, jurnalistlər də bu məsuliyyəti daşımalıdırlar və eyni zamanda, onların məsuliyyəti bəlkə də daha da çox olmalıdır.» Dövlətimizin başçısı, eyni zamanda, bu inamı ifadə edir ki, media sahəsində gələcək inkişafı müstəqil, sözün əsl mənasında, müstəqil medianın gücləndirilməsində görürəm.
Jurnalist peşəkarlığının artırılması istiqamətində addımlar davamlıdır. Möhtərəm Prezidentimiz İlham Əliyev jurnalistlərin vətənpərvər olmalarını ən vacib amil kimi diqqətə çatdırır: «Bütövlükdə Azərbaycan jurnalistikası öz dövlətinə, xalqına, dövlətçiliyinə bağlıdır. Xüsusilə gənc müstəqil dövlətlərdə vətənpərvərlik hissləri daha da güclü olmalıdır və daim mən bu məsələ ilə bağlı öz fikirlərimi bildirirəm. Bir daha demək istəyirəm ki, bu, sadəcə olaraq bir şüar, bir söz deyil, bu, zərurətdir. Bizim gənclərimiz vətənpərvərlik ruhunda böyüməlidir, tərbiyə almalıdır və jurnalistikanın bu sahədə çox böyük rolu vardır.»
Azərbaycanın müharibə şəraitində yaşadığını nəzərə alsaq, bu gün cəmiyyətin yazılı və elektron KİV-lərdən gözləntilərinin nədən ibarət olduğunu daha aydın görə bilərik. Möhtərəm Prezidentimizin yuxarıda qeyd etdiyimiz fikrindən də göründüyü kimi, ölkəmizdə jurnalist peşəkarlığı və məsuliyyəti heç də aşağı səviyyədə deyil. Amma əgər zaman dəyişirsə, qarşıya yeni tələblər çıxırsa, sözsüz ki, cəmiyyətin güzgüsü olan mətbuat da təkmilləşdirilməli, jurnalist peşəkarlığı və məsuliyyəti daha da artırılmalıdır. Bu istiqamətdə Mətbuat Şurasının, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun həyata keçirdiyi tədbirlər və layihələr təqdirəlayiqdir. Azərbaycan Mətbuat Şurasının qarşısında duran əsas məqsədlərdən biri jurnalistlərin peşə etikası Kodeksinin tələblərinə əməl etmələrinə ictimai nəzarətin həyata keçirilməsi, «reket jurnalistikası»na qarşı mübarizədir. Qurum fəaliyyətə başladığı gündən KİV-lərin saflaşdırılması istiqamətində mühüm addımlar atmış, jurnalistlərin peşəkarlığının artırılması işində müsbət nəticələr əldə etmişdir. Dövlətimizin başçısı cənab İlham Əliyev Azərbaycan jurnalistlərinin VI qurultayının iştirakçılarına ünvanladığı təbrikində bu məqamı xüsusi qeyd etmişdir ki, Azərbaycan jurnalistlərinin I qurultayında mətbuatın özünütənzimləmə orqanı kimi yaradılmış Mətbuat Şurası media-dövlət, media-cəmiyyət münasibətlərinin müasir beynəlxalq təcrübəyə uyğun nizamlanmasında əhəmiyyətli rol oynamışdır. Mətbuat Şurasının fəaliyyəti bütövlükdə Azərbaycan jurnalistikasının inkişafına, dövlət orqanları, vətəndaşlarla mətbuat arasında münasibətlərin tənzimlənməsinə, jurnalistlərin peşəkarlığının yüksəlməsinə, söz və məlumat azadlığından sui-istifadə hallarının qarşısının alınmasına xidmət etmişdir.
Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun və Mətbuat Şurasının icra hakimiyyətləri və nazirliklərlə birlikdə günümüzün reallığını əks etdirən ayrı-ayrı mövzulara aid yazı müsabiqələri təşkil etmələri, qaliblərin mükafatlandırılması müstəqil mətbuatın inkişafına, jurnalistlərin peşəkarlığının artırılmasına, yaradıcılıq imkanlarının genişləndirilməsinə yönəlmiş ən mütərəqqi addımlardır. Fond yazı müsabiqələrinin keçirilməsinə xüsusi önəm verməklə jurnalistlərin fərdi peşəkarlığına, redaksiyalarda yaradıcılıq mühitinin inkişafına dəstək olur. Dövlətimizin başçısı cənab İlham Əliyev Mətbuat Şurasının yeni binasının açılışında bildirmişdir: «Hesab edirəm ki, peşəkarlıq artdıqca, jurnalistikada bax, qeyd etdiyiniz bu reket məsələləri də aradan qaldırılacaqdır. Ondan sonra bizim milli adət-ənənələrimizə xas olmayan başqa məqamlar da aradan qaldırılacaqdır. Təhqirlərə, böhtanlara, yalanlara son qoyulacaqdır. Mən hesab edirəm ki, bunun vaxtı çatıbdır.»
- Dövrün tələblərindən biri də internet jurnalistikasının inkişafıdır. Bununla bağlı fikirlərinizi bilmək istərdik...
- İnformasiya cəmiyyəti elə cəmiyyətdir ki, burada əhalinin böyük hissəsi müasir informasiya texnologiyalarından istifadə etməklə informasiyanın istehsalı, saxlanması, emalı və ötürülməsi ilə məşğul olur. Artıq virtual məkanın yaratdığı imkanlar hesabına bir ölkədə yaşamaqla digər ölkədə cərəyan edən hadisələr barədə dolğun məlumat əldə etmək mümkündür. Müasir texnologiyalar imkan verir ki, fiziki imkanları məhdud olan şəxslər də internet vasiətsilə jurnalist kimi fəaliyyət göstərsinlər. Bütün bunlar internet jurnalistikanın əhatə dairəsinin genişlənməsini, inkişafını stimullaşdıran əsas amillərdəndir. Müqayisəli təhlillər fonunda bir daha təsdiqlənir ki, zaman dəyişdikcə təkmilləşmə bir tələb kimi ortaya qoyulur. Əvvəllər insanlarda informasiya əldə etmək üçün oxumağa, radioya qulaq asmağa, televiziyanı izləməyə ehtiyac yaranırdısa, bu gün artıq həyatımızın ayrılmaz parçasına çevrilən, müxtəlif qurumlar, insanlar arasında münasibətlərin yaranmasında xüsusi rolu olan sosial şəbəkə, daim yenilənən xidmət sahələri ilə insanları təəccübləndirən, uzaqları yaxın edən, informasiya məkanında inqilab adlandırılan, cəmiyyətin hər üzvünü hadisələr haqqında məlumatlandıran internet ictimai rəyin formalaşdırılmasında əhəmiyyətli rol oynayır. Əsas məsələ internetdən istifadə zamanı informasiya məsuliyyətini dərindən dərk edib, məlumatların ictimaiyyətə çatdırılmasında, auditoriyanın formalaşdırılmasında peşəkarlığın səviyyəsini qorumaqdır.
- Vüqar müəllim, ölkəmizin çoxsaylı mətbu orqanları sırasında öz dəst-xətt ilə seçilən «İki sahil» qəzeti bu günlərdə 25 illiyini qeyd etdi. Rəhbərlik etdiyiniz qəzetin keçdiyi yolu necə şərh edərdiniz və gələcək üçün hansı bazanı formalaşdırdığını göstərə bilərdiniz?
- «İki sahil»in yaranmasının ölkəmizdə ictimai-siyasi durumun gərgin olduğu, Azərbaycanın böyük faciələrlə üz-üzə qaldığı bir vaxta təsadüf etdiyini nəzərə alsaq, dövlətə xidməti fəaliyyətinin əsas prinsipinə çevirən, «düzü düz, əyrini əyri» yazmağı qarşısına məqsəd qoyan mətbuat orqanı üçün hansı çətinliklərin, təzyiqlərin mövcudluğunu aydın təsəvvür etmək mümkündür. «İki sahil» o dövrün reallıqlarını ictimaiyyətə çatdırmaqdan çəkinmədi. Öz ideallarına sadiq qalaraq sınaqlardan şərəflə çıxdı. Qəzetin səhifələrində Azərbaycanın bu günü və gələcəyi naminə dahi şəxsiyyət Heydər Əliyevin hakimiyyətə qayıdışının vacibliyi qeyd olundu. Azərbaycan xalqının böyük əksəriyyətinin idarəsinin ifadəsi olan 91 nəfər ziyalının ümummilli lider Heydər Əliyevə «Azərbaycan Sizin sözünüzü gözləyir» sərlövhəli müraciəti qəzetimizin səhifələrində geniş yer aldı. Müraciətdə də bu fikir xüsusi qeyd olunurdu ki, indiki vəziyyətdə bu çətin, məsuliyyətli işi respublikada öz üzərinə götürməyə qadir yeganə şəxs Sizsiniz. Aydındır ki, bu müraciətin əsas məqsədi geniş xalq kütləsini əhatə edəcək çox böyük, güclü, nüfuzlu və işlək bir partiyanın yaradılması, ona ulu öndər Heydər Əliyevin rəhbərlik etməsi idi. Müraciətdə Ulu Öndərə xitabən bu əminlik də ifadə olunmuşdu ki, yalnız Sizin rəhbərliyiniz sayəsində yaratmaq istədiyimiz Yeni Azərbaycan Partiyası qarşısına qoyduğu məqsədə çatar, respublikanın bütün zümrələrindən olan xalq kütləsini öz ətrafında birləşdirərək Azərbaycanın siyasi, iqtisadi həyatında mövcud olan boşluğu dolduracaq, dövlət quruculuğu işində öz layiqli töhfəsini verə biləcək. Ümummilli Lider Azərbaycan ziyalılarının müraciətinə cavabı ilə bir daha xalqla həmrəyliyini nümayiş etdirdi. Yaradılacaq partiyanın fəaliyyətində fəal iştirak etməyə hazır olduğunu bildirən ümummilli lider Heydər Əliyev bu inamı ifadə etmişdir ki, belə partiya Azərbaycanın ictimai-siyasi həyatında fəal iştirak edərək yeni, müstəqil Azərbaycan dövlətinin möhkəmləndirilməsində və inkişafında tarixi rol oynaya bilər.
Bu gün ölkənin ictimai-siyasi həyatında aparıcı rol oynayan, sıralarında 700 minə yaxın üzvü birləşdirən Yeni Azərbaycan Partiyasının 1992-ci ildə yaranmasını zərurətə çevirən həmin dövrün reallıqları oldu. Bütün bu keçilən yol «İki sahil» qəzetində geniş işıqlandırıldı, ictimaiyyət nümayəndələrinin fikir və mülahizələri, rəyləri dərc olundu, ümumi fikir bu oldu ki, ulu öndər Heydər Əliyev xalqın təkidli tələbi ilə hakimiyyətə qayıdışı ilə Azərbaycanın müstəqillik tarixinin yeni səhifəsini yazdı. Azərbaycan parçalanmaqdan xilas oldu, yeni Azərbaycan quruldu. İllər bir-birini əvəzlədikcə Azərbaycan uğurları ilə dünyanın diqqətində dayandı. Qısa zamanda sabitlik diyarına çevrilən ölkəmiz eyni zamanda əməkdaşlıq məkanına çevrildi. «İqtisadiyyatı güclü olan dövlət hər şeyə qadirdir» bəyan edən ulu öndər Heydər Əliyevin 22 il əvvəl əsasını qoyduğu yeni neft strategiyası, bu strategiyanın təməlində dayanan «Əsrin müqaviləsi» Azərbaycanın bugünkü və gələcək yoluna işıq saçır. Azərbaycanın zəngin təbii resurslarının dünya bazarlarına çıxarılması, neft gəlirlərinin ölkəmizin hərtərəfli inkişafına, xalqımızın rifahının yüksəlməsinə sərf edilməsi Ulu Öndərin gələcəyə hesablanmış fəaliyyətində əsas yer tuturdu. SOCAR-in təsisçiliyi ilə fəaliyyət göstərən «İki sahil» ölkəmizin hərtərəfli inkişafının təməl daşı olan iqtisadi sahədə, o cümlədən neft-qaz sektorunda qazanılan uğurların təbliğatçısına çevrilərək, bu gün də bu missiyanı uğurla yerinə yetirir.
1994-cü il sentyabrın 20-də ümummilli lider Heydər Əliyevin qətiyyəti ilə imzalanan «Əsrin müqaviləsi» ilə icrasına başlanan qlobal enerji layihələri beynəlxalq əməkdaşlığı genişləndirməklə xarici sərmayələrin ölkəyə gətirilməsi prosesini gücləndirdi. Enerji təhlükəsizliyi məsələlərinə diqqəti artırmaqla iqtisadi yüksəlişinin təməli qoyulan Azərbaycan müstəqil siyasət yeritdi. Vaxtilə çoxlarına əfsanə kimi görünən Bakı-Tbilisi-Ceyhan və Bakı-Tbilisi-Ərzurum neft-qaz layihələri reallığa çevrilməklə, bu gün artıq regional müstəvidən çıxıb, qlobal xarakter daşıyır. Möhtərəm Prezident İlham Əliyevin vurğuladığı kimi, bu layihələr olmasaydı, bu gun «Cənub Qaz Dəhlizi»ndən söhbət gedə bilməz, Avropanın enerji təhlükəsizliyi məsələləri tamamilə başqa istiqamətdə həll olunardı: «Bu gün əldə edilmiş uğurlar əsasında gələcəyə baxırıq. O gələcəyə ki, qarşımızda yeni imkanlar, yeni üfüqlər açılır.»
Uğurlar biri-birini əvəzlədikcə dövlətə və dövlətçiliyə xidmət yolunu tutan «İki sahil» qəzetinin səhifələrndə müşahidə olunan informasiya bolluğu diqqətdən yayınmır, oxucu auditoriyası daha da genişlənir. Qəzetin hər sayında dövlətimizin uğurlu iqtisadi siyasəti nəticəsində əldə olunan nailiyyətlər rəqəmlərin dili ilə ictimaiyyətə çatdırılır. İqtisadi tərəqqinin hər bir sahənin inkişafı üçün stimul olduğu əsaslı şəkildə şərh edilir. Bu inkişafa verdiyi töhfələri daim yüksək dəyərləndirilən SOCAR və onun ayrı-ayrı strukturlarının gördüyü işlər, qarşıya qoyduğu planlar qəzetimizdə xüsusi yer tutur. Bu gün adı beynəlxalq şirkətlər sırasında qeyd olunan SOCAR fəaliyyət istiqamətlərini genişləndirməklə uğurlarının davamlılığını yüksək səviyyədə təmin edir.
Təbii ki, uğurlarımız çoxdur. Azərbaycan ulu öndər Heydər Əliyevin düzgün müəyyənləşdirdiyi siyasətin bu gün möhtərəm Prezidentimiz İlham Əliyev tərəfindən uğurla davam etdirilməsi nəticəsində ən yüksək zirvələri fəth edir. Ölkəmizin hər sahədə qazandığı uğurlar «İki sahil»in səhifələrində yer alır. Azərbaycan dövlətinin artan imkanları milli mətbuatımızın inkişafı yolunda çətinliklərin aradan qaldırılmasına, onun aktual problemlərinin həlli məqsədilə kompleks tədbirlərin həyata keçirilməsinə şərait yaradır. Bu qayğını qəzetimiz hər zaman hiss edir, yüksək dəyərləndirir. Qəzetimizdə mövzu rəngarəngliyi, müəyyən məsələlərə yanaşma tərzi məsuliyyətli yaradıcı mühitin mövcudluğundan xəbər verir. 25 ildə qəzet jurnalist fəaliyyətinə başlayanlar üçün təcrübə məktəbi oldu. Bu gün vaxtilə qəzetin əməkdaşı olanlar ayrı-ayrı mətbu orqanlara rəhbərlik edir, qazandıqları təcrübəni kollektivin əməkdaşları ilə bölüşürlər. Məsuliyyət varsa, peşəkarlıq da olacaq. Bu isə özü-özlüyündə yüksək səviyyəli yazıların yaranmasına yol açır. «İki sahil» 25 ildə qazandığı uğurlar fonunda gələcəyə doğru inamla addımlayır. «İki sahil»in daim yeniləşən internet saytı, qısa müddətdə fəaliyyətə başlamasına baxmayaraq geniş tamaşaçı kütləsi qazanan «İki sahil» internet televiziyası cəmiyyətin informasiya tələbatının ödənilməsinə öz töhfəsini verməyə səy göstərir. Biz bu prinsipi də fəaliyyətimizdə əsas götürmüşük ki, qəzetin bugünkü sayı dünənki sayından müəyyən yeniliyi ilə fərqlənsin, yazıların keyfiyyəti, informasiya yükü artsın. Təbii ki, dövlətə, dövlətçiliyə xidməti fəaliyyətinin önündə saxlayan mətbuat orqanı olaraq qazandığımız uğurlar dövlətimizin 25 illik müstəqillik tarixi ilə sıx bağlıdır. Qazanılan uğurlar 25 illik zaman kəsiyini xeyli zənginləşdirdiyi üçün əldə olunanları bir qəzet yazısı çərçivəsində əhatə etmək qeyri-mümkündür. Ötən illər ərzində qəzetimizin fəaliyyəti daim yüksək dəyərləndirilmiş, əməkdaşlarımızın bir qismi «Əməkdar jurnalist» fəxri adına və eyni zamanda «Tərəqqi» medalına layiq görülmüşdür. Etimad böyük məsuliyyətdir. Bu məsuliyyəti yüksək səviyyədə dərk edərək, müstəqil, azad mətbuatın inkişafına öz töhfəmizi daha da artırmağımıza çalışırıq.